काठमाडौँ। सरकारले प्रधानमन्त्रीको प्रेस सल्लाहकारमा रामबहादुर रावललाई नियुक्त गरेको छ।

मन्त्रिपरिषद्को सोमबारको बैठकले रावललाई प्रधानमन्त्रीको प्रेस सल्लाहकारमा नियुक्त गरेको मंगलबार आयोजित पत्रकार सम्मेलनमा सरकारका प्रवक्ता एवं सञ्चार तथा सूचना प्रविधिमन्त्री जगदीश खरेलले जानकारी दिए। उनले आगामी २६ देखि २८ माघमा इटलीको रोममा आयोजना हुने कृषि विकाससम्बन्धी कार्यक्रममा भाग लिन कृषि तथा पशुपन्छी विकासमन्त्री मदनप्रसाद परियारलाई स्वीकृति प्रदान गरेको जानकारी दिए।

त्यस्तै आगामी २६ माघदेखि १ फागुनसम्म मेक्सिकोमा आयोजना हुने एएमएल/सीएफटीको ‘प्लेनरी तथा वर्किङ ग्रुप’ बैठकमा सहभागी हुन अर्थ मन्त्रालयका सचिव (राजस्व) भूपाल बराललाई अनुमति दिएको छ।

बैठकले दलितको हकअधिकार तथा विकाससम्बन्धी विधेयक’ तर्जुमा गर्न सिद्धान्त स्वीकृत गरेको छ। सरकारले आगामी ६ र ७ माघमा चीनको सिजाङ्ग (ल्हासा) मा आयोजना हुने नेपाल-चाइना को-अडिनेसनसम्बन्धी तेस्रो बैठकमा सहभागी हुन उद्योग, वाणिज्य तथा आपूर्ति मन्त्रालयका सचिव रामप्रसाद घिमिरेको नेतृत्वको नेपाली प्रतिनिधिमण्डललाई स्वीकृति दिएको छ।

नेपाल न्याय सेवा, कानुन समूहका राजपत्राङ्कित प्रथम श्रेणीका आठ अधिकृतको सरुवा गर्ने र सोही सेवाका राजपत्राङ्कित द्वितीय श्रेणीका आठ अधिकृतलाई सम्बन्धित समूहको राजपत्राङ्कित प्रथम श्रेणीमा पदस्थापन गर्ने सरकारको निर्णय छ।

सरकारको निर्णय : गोरखापत्र संस्थानको अध्यक्षमा भण्डारी

म्यानमारमा भइरहेको तेस्रो चरणको निर्वाचनमा अन्तर्राष्ट्रिय निर्वाचन पर्यवेक्षकका रूपमा आगामी ९ देखि १२ माघसम्म सहभागी हुन निर्वाचन आयुक्त जानकीकुमारी तुलाधरलाई स्वीकृति दिएको छ।

सरकारले समस्याग्रस्त सङ्घसंस्थाको सम्पत्ति व्यवस्थापन तथा दायित्व भुक्तानीसम्बन्धी कार्य गर्ने व्यवस्थापन समितिको सदस्य उद्धवप्रसाद तिमल्सेनाको राजीनामा स्वीकृत गर्ने र उक्त पदमा मधुकर राना (ललितपुर) लाई मनोनयन गरेको छ।

आगामी २८ माघदेखि १ फागुनसम्म मोरक्कोको माराकेसमा आयोजना हुने बालश्रमसम्बन्धी कार्यक्रममा सहभागी हुन श्रम, रोजगार तथा सामाजिक सुरक्षा मन्त्रालयका सचिव दीपक काफ्लेलाई स्वीकृति दिएको छ। स्पेनको मड्रिडमा हुने अन्तर्राष्ट्रिय पर्यटन मेलामा संस्कृति, पर्यटन तथा नागरिक उड्डयन मन्त्रालयका सचिव मुकुन्दप्रसाद निरौलाको आगामी ६ देखि १२ माघसम्म सहभागी हुन स्वीकृति दिएको खरेलले जानकारी दिए।

सरकारले इलामको फिक्कल, सोलुखुम्बुको सोताब, बाजुराको कोल्टी र मुगुको रामतडीमा मालपोत कार्यालय तथा नापी कार्यालय स्थापना गर्नेगरी मालपोत कार्यालय र नापी कार्यालयहरूको सङ्गठन संरचना र दरबन्दी तेरिज स्वीकृत गरेको छ।

त्यसैगरी सरकारले आगामी १९ देखि २४ माघसम्म स्विट्जरल्यान्डको जेनेभामा आयोजना हुने विश्व स्वास्थ्य सङ्गठनको ‘सेक्सन अफ द एजेटिभ बोर्ड’मा स्वास्थ्य तथा जनसङ्ख्या मन्त्रालयका सचिव विकास देवकोटालाई सहभागी हुन स्वीकृति दिएको छ।