म्याग्दी। अर्थमन्त्री रामेश्वरप्रसाद खनालले स्रोतको अभावबाट निर्वाचनमा कुनै अवरोध सिर्जना नहुने स्पष्ट पारेका छन्। आगामी २१ फागुनमा हुने प्रतिनिधिसभा निर्वाचनका लागि सरकारले आर्थिक स्रोतको व्यवस्था मिलाएकाले निर्धक्क भएर चुनावको तयारीलाई निरन्तरता दिन निर्देशन दिए।

खनालले सुरक्षा निकाय‚ मुख्य निर्वाचन अधिकृत र निर्वाचन कार्यालयका अधिकारीहरूसँग निर्वाचनको तयारी र जिल्लाको वस्तु अवस्थाका विषयमा जानकारी लिए। “नयाँ पुराना सबै राजनीतिक दलहरूले सौहार्द र शान्तिपूर्ण तरिकाले चुनावमा भाग लिने वातावरण बनाएर सफल बनाउने सरकारको अहिलेको प्रमुख दायित्व हो‚” अर्थमन्त्री खनालले भने‚ “स्रोतको अभावले निर्वाचनमा कुनै अवरोध हुँदैन भन्ने विश्वास दिलाउँछु।”

उनले मिथ्या र भ्रामक सूचना प्रवाह रोक्न संवेदनशील बन्न आग्रह गरे। भ्रामक‚ मिथ्या सूचना र २४ भदौमा लुटिएका हतियारलाई सरकारले चुनावका लागि चुनौतीका रूपमा लिएर त्यसको सामना गर्ने रणनीति बनाएको बताए।

मौसमका कारणले २१ फागुनमा कुनै स्थानमा मतदानमा समस्या आएमा त्यसको निर्णय निर्वाचन आयोगले तत्कालै लिने बताउँदै मन्त्री खनालले चुनावको मितिमा सरकारले सम्झौता नगर्ने स्पष्ट पारे।

मन्त्री खनाललाई मुख्य निर्वाचन अधिकृत सूर्यबहादुर थापा‚ प्रमुख जिल्ला अधिकारी रवीन्द्र आचार्यलगायत सुरक्षा अधिकारीसँग चुनावको तयारीका विषयमा जानकारी लिए। हालसम्म शान्ति र सौहार्दपूर्ण रूपमा चुनावको तयारी अघि बढेको उनीहरूले जानकारी दिएका थिए।

जिल्ला निर्वाचन अधिकारी विमलप्रसाद गौतमले अस्थायी मतदाता र चुनावमा खटिने कर्मचारीको नामावली सङ्कलन भइसकेको जानकारी दिए। ६ वटा स्थानीय तह र ४५ वटा वडा रहेको म्याग्दीमा प्रतिनिधिसभामा एउटा मात्र निर्वाचन क्षेत्र छ।

म्याग्दीमा ११ जना दल र एकजना स्वतन्त्र उम्मेदवार छन्। ८६ हजार ३९७ जना मतदाता छन्। ८२ वटा मतदानस्थल र १२० मतदान केन्द्र छन्।