काठमाडौँ। प्रतिनिधिसभा सदस्यमा आज पद तथा गोपनीयताको शपथ लिने सदस्यहरू अधिकांश नयाँ अनुहार रहेका छन्।

गत फागुन २१ गते सम्पन्न निर्वाचनबाट निर्वाचित अधिकांश सांसद नयाँ अनुहार छन् भने सीमित दलका सदस्य मात्रै दुई वा दुईपटक बढी निर्वाचित भएका छन्।

यस निर्वाचनमा राष्ट्रिय स्वतन्त्र पार्टी (रास्वपा), नेपाली कम्युनिष्ट पार्टी (नेकपा) र श्रम संस्कृति पार्टीका नेतृत्वबाहेक निर्वाचनमा सहभागी अन्य दलका शीर्ष नेतृत्व सदनमा देखिने छैनन्।

निर्वाचनमा १८२ सदस्य विजयी भएका रास्वपामा यस पटक १४ जना सांसदहरू दोहोरिएका छन्।

पार्टी सभापति रवि लामिछाने, उपसभापतिद्वय डोलप्रसाद अर्याल र डा. स्वर्णिम वाग्ले यसअघि पनि सदनमा थिए। यसैगरी दोहोरिने सांसदहरूमा इन्दिरा राना मगर, डा. अमरेशकुमार सिंह, सोविता गौतम, शिशिर खनाल, गणेश पराजुली, हरि ढकाल, अशोककुमार चौधरी, विराजभक्त श्रेष्ठ, निशा डाँगी, मनिष झा र डा. तोसिमा कार्की छन्। उनिहरू प्रत्यक्ष निर्वाचन प्रणालीमार्फत निर्वाचित हुन्।

यस निर्वाचनमा नेपाली कांग्रेसबाट निर्वाचित हुनुभएका ३८ जना सांसदमध्ये आठ सदस्य दोहोरिएका छन्। सांसदहरू अजुर्ननरसिंह केसी, भीष्मराज आङ्देम्बे, मोहन आचार्य, भरतबहादुर खड्का, जनक गिरी, चन्द्रमोहन यादव, टेकबहादुर गुरु, योगेश गौचन थकाली, चन्द्रमोहन यादव र अभिशेकप्रताप साह यसअघि पनि सांसद थिए।

नेकपा (एमाले)का २५ जना निर्वाचित सांसदमध्ये रामबहादुर थापा बादल, पद्मा अर्याल, यज्ञबहादुर बोगटी, गणेशसिंह ठगुन्ना, मोहम्मद इस्तियाक राई, लक्ष्मीप्रसाद पोखरेल र सुहाङ नेम्वाङ दोहोरिएका छन्।

नेपाली कम्युनिष्ट पार्टीका निर्वाचित १७ सांसदमध्ये पुष्पकमल दहाल ‘प्रचण्ड’, मातृकाप्रसाद यादव, वर्षमान पुन, धनबहादुर बुढा र महेन्द्रबहादुर शाही दोहोरिएका छन्।

राष्ट्रिय प्रजातान्त्रिक पार्टी (राप्रपा)का तर्फबाट पाँच जना सांसदमध्ये ज्ञानेन्द्रबहादुर शाह दोहोरिएका छन्। उनि सो पार्टीबाट प्रत्यक्ष निर्वाचित एक मात्र सांसद हुन्।