काठमाडौँ। नवनियुक्त गृहमन्त्री सुधन गुरुङले सेवा प्रवाहलाई सहज बनाउँदै भ्रष्टाचारप्रति शून्य सहनशीलताको नीति अपनाउन निर्देशन दिएका छन्।

गृह मन्त्रालयमा आज पदबहाली गरेपछि कर्मचारीलाई निर्देशन दिँदै उनले भ्रष्टाचारीविरुद्ध कठोर निर्णय लिने उद्घोष गरे। उनले भने, “भ्रष्टाचारप्रति शून्य सहनशीलता हुन्छ। कसैले घुस माग्यो भने त्यसलाई त्यत्तिकै छाडिँदैन।”

आफू जनतालाई परिणाम दिने गरी काम गर्न मन्त्रालयको नेतृत्वमा आएको उल्लेख गर्दै गृहमन्त्री गुरुङले एकद्वार प्रणालीबाट शीघ्र सेवा प्रवाह गर्ने व्यवस्था मिलाउन निर्देशन दिए। कम बोल्ने र नतिजा देखाउनेमा आफू केन्द्रित हुने उनले बताए। “सेवा प्रवाहलाई मुख्य प्राथमिकतामा राखिएको छ। १, २, ३ वा क, ख, ग कोठा चहार्नुपर्ने अवस्थाको अन्त्य हुनुपर्छ, सेवाग्राहीसँग कर्मचारी ठोकिनु नपरोस्, यसैबाट सुशासन ल्याउन सकिन्छ,” उनले भने।

जेन-जीको जनादेशलाई कार्यान्वयन गर्न मन्त्रिपरिषद्‌बाट निर्णय भएपछि त्यसलाई सबैले आत्मसात् गर्नुपर्ने जनाउँदै उनले सरकारका निर्णय कार्यान्वयन गर्दिनँ भन्ने छुट कसैलाई नभएको स्पष्ट पारे।