काठमाडौँ
००:००:००
२० जेष्ठ २०८३, बुधबार
काठमाडौँ। राष्ट्रिय रग्बी सेभेन्स महिला तथा पुरुष च्याम्पियनसिप २०२६ मा पुरुषतर्फ एपीएफ क्लब र महिलातर्फ त्रिभुवन आर्मी क्लब च्याम्पियन बनेका छन्।
त्रिपुरेश्वरस्थित दशरथ रंगशालामा आइतबार भएको फाइनल खेलमा महिलातर्फ आर्मीले एपीएफलाई २२-१२ ले पराजित गर्दै उपाधि जित्यो।
पुरुषतर्फ एपीएफले आर्मीमाथि १०-५ को प्रतिस्पर्धात्मक जित निकाल्दै च्याम्पियन बन्न सफल भयो।
यस्तै तेस्रो स्थानका लागि भएको खेलमा पुरुषतर्फ गण्डकीले कर्णाली प्रदेशलाई १२-७ ले हरायो। महिलातर्फ बागमतीले कर्णाली प्रदेशलाई ५-० ले पराजित गर्दै तेस्रो स्थान हासिल गर्यो।
व्यक्तिगततर्फ पुरुषमा एपीएफका रोहन डंगोलले उत्कृष्ट खेलाडी घोषित हुँदै ट्रफीसहित पाँच हजार रुपैयाँ प्राप्त गरे। महिलातर्फ आर्मीकी कुमारी श्रेष्ठ उत्कृष्ट खेलाडी घोषित हुँदै पाँच हजार रुपैयाँ र ट्रफी हात पारिन्।
राष्ट्रिय रग्बी सेभेन्स महिला तथा पुरुष च्याम्पियनसिपको विजेता महिला टोली।
सेमिफाइनलमा पुरुषतर्फ आर्मीले कोसी प्रदेशलाई ४१-५ को फराकिलो अन्तरले हराएको थियो। एपीएफले गण्डकी प्रदेशलाई २४-० ले पराजित गर्दै फाइनलमा स्थान बनाएको थियो। महिलातर्फ एपीएफले बागमती प्रदेशलाई र आर्मीले कर्णाली प्रदेशलाई हराउँदै उपाधि भिडन्त तय गरेका थिए।
प्रतियोगितामा विजेता टोलीले ५० हजार रुपैयाँ तथा उपविजेताले ३० हजार रुपैयाँ नगद पुरस्कार प्राप्त गरे।
नेपाल रग्बी संघको आयोजनामा दुई दिन सञ्चालन भएको प्रतियोगितामा महिला र पुरुष गरी कुल १४ टोलीको सहभागिता थियो।
समापन समारोहमा राष्ट्रिय खेलकुद परिषद् (राखेप) का निवर्तमान सदस्य-सचिव तथा एसिया रग्बी संघका उपाध्यक्ष टंकलाल घिसिङलगायत विशिष्ट व्यक्तित्वको उपस्थिति थियो।
