इलाम। इलाम गोल्डकपको दोस्रो दिनको खेलमा रोलिङ क्लब धुलाबारी झापाले फिदिम स्पोर्टिङलाई ३-० गोलअन्तरले पराजित गरेको छ। जितसँगै रोलिङ क्लब सेमिफाइनलमा प्रवेश गरेको छ।

रोलिङ क्लबका तर्फबाट प्रतापसिंह राईले मध्यान्तर अगाडिको २४औँ मिनेटमा पहिलो गोल गरे । लगत्तै उक्त टोलीका नीरज कार्कीले २५औँ मिनेटमा दोस्रो गोल गरे। मध्यान्तरपछाडि सुरुमै अरुण मेचेले फिदिम स्पोर्टिङविरुद्ध तेस्रो गोल गरे।

फिदिम स्पोर्टिङ पाएको पेनाल्टी सदुपयोग गर्न नसक्दा ३-० गोलअन्तरले पराजित हुन पुग्यो। खेलको ‘म्यान अफ दी म्याच’ रोलिङ क्लबका प्रतापसिंह राई घोषित भए। उनले आठ हजार रुपैयाँ पुरस्कार पाए।

सोमबार एन पेनाङ मलेसिया र मच्छिन्द्र फुटबल क्लब काठमाडौँबीच प्रतिस्पर्धा हुने आयोजक रेडहर्ष फुटबल क्लबले जनाएको छ। यही १२ वैशाखसम्म सञ्चालन हुने उक्त प्रतियोगिताको विजेता टोलीले १० लाख र उपविजेताले पाँच लाख रुपैयाँ प्राप्त गर्नेछन्।