काठमाडौँ। नेपाली कांग्रेसका महामन्त्री प्रदीप पौडेलले अदालतको निर्णयले हार-जित नभई बाटो तय गर्ने स्थिति बनाएको बताएका छन्।

बागमती प्रदेशको निर्वाचन समीक्षाका क्रममा हेटौँडामा आयोजित कार्यक्रममा उनले सबै पक्षलाई सँगै हिँडाएर अधिवेशनसम्म लैजाने बताए। “हारजित होइन बाटो तय गर्ने स्थिति अदालतले बनाइदिएको छ,” उनले भने,“सबैलाई सँग-सँगै एउटै बाटो हिँडाएर अधिवेशनसम्म लैजान्छौँ।”

अहिले सदस्यता अद्यावधिक चलिरहेको भन्दै उनले यसमा छनोटको सुविधा नभएको बताए। यसका लागि इमानदारीपूर्वक काम गर्न उनले वडा सभापतिहरूसँग आग्रह गरे। “कसैले सदस्यता माग्यो भने इफ वा बट नभी दिनुहोला,” उनले भने,“छुटेकालाई नवीकरण गर्न लगाऔँ।”

क्रियाशील सदस्य धेरै भए पनि देशका १७ निर्वाचन क्षेत्रमा क्रियाशीलबराबर वा त्योभन्दा कम भोट आएको स्मरण गर्दै महामन्त्री पौडेलले पहिले अन्त भोट हालेको व्यक्ति पार्टीमा आउन चाहँदा वातावरण तयार पार्न आग्रह गरे। आगामी वर्ष स्थानीय तहको निर्वाचन हुने भन्दै उनले डिजिटल प्रविधिबाट सदस्यता नवीकरणले नै जित्ने आधार तयार पार्ने दाबी गरे।

“विभिन्न जिम्मेवारीमा रहेका हामी सबैले मेरो जिम्मेवारी पूरा गर्नुपर्छ भनेर नलाग्ने हो भने हामीले स्थानीय चुनाव जित्न सक्दैनौँ,” उनले भने। नागरिकसँग कसरी जोडिने भनेर संगठनले योजना तय गरेको बताएका महामन्त्री पौडेलले आफू जोडिएको संगठन गतिशील बनाएर अघि बढिदिन आग्रह गरे। “संगठित संरचनाले अघि बढाउन सहयोग गरे छिटो र सजिलोसँग पार्टीलाई रुपान्तरण गर्न सकिनेछ,” उनले भने, “तर यो जिम्मेवारी होइन भनेर हुँदैन।”