काठमाडौँ । पूर्वराजा ज्ञानेन्द्र शाह शुक्रबार पोखरा पुगेका छन्। उनको आगमनका क्रममा समर्थकहरू पोखरा विमानस्थलमा भेला भई स्वागत गरेका छन्।

विमानस्थल क्षेत्रमा बाजागाजासहित उपस्थित समर्थकहरूले स्वागत कार्यक्रम गरेका थिए। सो क्रममा केही समूहले राजसंस्थाको पक्षमा तथा वर्तमान व्यवस्थाविरुद्ध नाराबाजी समेत गरेका जनाइएको छ।

लोकतन्त्र दिवसकै दिन शाह पोखरा पुगेका हुन्। उनी पोखरामा हालै सञ्चालनमा आएको सोल्टी होटेलमा बस्ने कार्यक्रम रहेको बताइएको छ।

सुरक्षा स्रोतका अनुसार शाह कम्तीमा दुई सातासम्म पोखरामा रहने प्रारम्भिक कार्यक्रमसहित त्यहाँ पुगेका हुन्। बसाइँ अवधिमा उनले विभिन्न स्थानको अवलोकन गर्नुका साथै भेटघाट कार्यक्रमसमेत गर्ने तयारी रहेको छ।