काठमाडौँ
००:००:००
२० जेष्ठ २०८३, बुधबार
काठमाडौँ। सरकारले काठमाडौं महानगरपालिका ९‚ गैरीगाउँ र वडा नम्बर ३१ शान्तिनगरका नदी किनार तथा जोखिमपूर्ण सार्वजनिक र सरकारी जग्गामा बनाइएका बस्तीहरू खाली गर्ने कार्यलाई निरन्तरता दिएको छ।
यसै क्रममा वडा ११ स्थित थापाथलीमा रहेको बस्ती शनिबार मध्याह्न साढे १२ बजे खाली गराएको छ।
बस्ती खाली गराउने कार्यमा नेपाल प्रहरी र महानगर प्रहरी बलले स्थानीयको सामान उठाउन र ढुवानीमा सहयोग गरेका थिए। बसोबास गरिरहेका नागरिकले समेत सरकारको यस कदममा ऐक्यबद्धता जनाउँदै सहयोग गरेपछि थापाथलीको बस्ती स्थानान्तरण कार्य शान्तिपूर्ण र सौहार्दपूर्ण रूपमा सम्पन्न भएको छ।
हालसम्म थापाथली, गैरीगाउँ र शान्तिनगरमा बसोबास गरिरहेका १४४ परिवार सरकारको सम्पर्कमा आएका छन्।
बस्तीमा कोही छुटेका छन् कि भनी खोजी तथा उद्धार कार्य पनि जारी राखिएको प्रधानमन्त्रीको सचिवालयले जनाएको छ।
सम्पर्कमा आएका र उद्धार गरिएका परिवारहरूलाई सुरुमा दशरथ रंगशाला पुर्याएर उनीहरूको विवरण सङ्कलन गरिएको छ।
उनीहरूलाई तत्कालका लागि काठमाडौँका विभिन्न होटलमा बसोबासको व्यवस्था मिलाइएको छ। यस्तै घरायसी सामान रंगशाला र कीर्तिपुरको सुन्दरीघाटस्थित राधास्वामी सत्संग व्यास नेपालमा छुट्टाछुट्टै स्थान तय गरी सुरक्षित रूपमा भण्डारण गरिएको छ।
यसैबीच कागेश्वरी मनोहरा नगरपालिका ८‚ गोठाटार बुद्धचोक र वडा ९ को मनोहरा टोलमा रहेका बस्तीहरू आजै खाली गर्ने तयारी भए पनि आजको लागि उक्त प्रक्रिया रोकिएको छ।
