काठमाडौँ । सर्वोच्च अदालतले व्यवसायी सुलभ अग्रवाललाई थुनामा राख्नुको कानुनी आधार स्पष्ट गर्न सम्बन्धित निकायलाई आदेश दिएको छ।

बन्दी प्रत्यक्षीकरण निवेदनमा सुनुवाइ गर्दै न्यायाधीश शान्तिसिंह थापाको एकल इजलासले उक्त आदेश जारी गरेको हो। निवेदन सुलभका पिता शंकरलाल अग्रवालले दायर गरेका थिए।

सम्पत्ति शुद्धीकरण अनुसन्धान विभागले चैत २२ गते सुलभ अग्रवाललाई अनुसन्धानको सिलसिलामा नियन्त्रणमा लिएको थियो। इन्फिनिटी होल्डिङ्स र शंकर ग्रुपबीच भएको भनिएको शंकास्पद वित्तीय कारोबारसँग सम्बन्धित अनुसन्धानका क्रममा उनी पक्राउ परेका हुन्।

उक्त प्रकरणमै शंकर ग्रुपका अध्यक्ष तथा सुलभका पिता शंकरलाल अग्रवाललाई पनि काठमाडौँबाट नियन्त्रणमा लिइएको भए पनि पछि हाजिरी जमानीमा रिहा गरिएको विवरण छ।

यसबीच, नेपाल राष्ट्र बैंकले करिब साढे दुई वर्षअघि नै शंकर ग्रुप र इन्फिनिटी होल्डिङ्सबीच भएका वित्तीय कारोबारबारे अनुसन्धान गर्न सम्बन्धित निकायलाई पत्राचार गरेको तथ्य पनि सार्वजनिक भएको छ। करोडौँ रुपैयाँ बराबरका शंकास्पद लेनदेन देखिएपछि प्रारम्भिक छानबिन अघि बढाइएको बताइएको छ।