काठमाडौँ। सरकारले विद्यालय शिक्षा सुधारका लागि फिनल्यान्ड सरकारसँग सहकार्य गर्न चासो देखाएको छ।

शिक्षा, विज्ञान तथा प्रविधिमन्त्री सस्मित पोखरेलसँग नेपालका लागि फिनल्यान्डका राजदूत पेट्री पुहाक्काले मन्त्रालयमा बिहीबार गरेको शिष्टाचार भेटमा सहकार्यका विषयमा छलफल भएको हो। फिनल्यान्डको शिक्षा विश्वकै उच्च गुणस्तरको मानिन्छ। वार्ताको क्रममा मन्त्री पोखरेलले फिनल्यान्डसँग शिक्षा क्षेत्रमा सहकार्य गर्ने प्रस्ताव राखेको उनको सचिवालयले जनाएको छ।

भेटमा शिक्षामन्त्री पोखरेलले नेपाल र फिनल्यान्डबीच सदैव सुखद र असल सम्बन्ध भएको उल्लेख गरे। उनले नेपालको विकासमा फिनल्यान्ड सरकारले गर्दै आएको सहयोगको लागि धन्यवाद दिए।

पोखरेलले सरकारको प्राथमिकता र आगामी कार्यक्रमबारे जानकारी गराउँदै फिनल्यान्ड सरकारका तर्फबाट शिक्षा क्षेत्रमा गरिएको सहयोगको सराहना गर्दै आगामी दिनमा पनि नेपालको शिक्षालगायत क्षेत्रमा फिनल्यान्डको निरन्तर सहयोगको अपेक्षा गरे।

शिक्षामन्त्री र राजदूतबीच द्विपक्षीय सम्बन्ध, विकास सहायता परिचालन, शिक्षा क्षेत्रमा फराकिलो साझेदारी अभिवृद्धिलगायत विषयमा छलफल भएको छ।

भेटमा राजदूत पुहाक्काले नेपालको शिक्षा क्षेत्रमा फिनल्यान्ड सरकारले गरेको सहयोगलाई आगामी पाँच वर्षसम्म निरन्तर रहने प्रतिबद्धता जनाए। फिनल्यान्डको सहयोगमा अहिले विद्यालय शिक्षा क्षेत्र कार्यक्रम र ‘टिचर्स एजुकेसन’ परियोजना सञ्चालित छन्।

नेपाल सरकारले अटिजम विद्यालय स्थापना गर्ने नीति लिएको सन्दर्भमा पुहाक्काले अटिजम र ‘इन्क्लुसिभ एजुकेसन’मा फिनल्यान्डको विज्ञता रहेकाले आफूहरू पनि यी शैक्षिक कार्यक्रममा सहयोग तथा सहकार्य गर्न इच्छुक रहेको बताए। उनले वर्तमान सरकारको प्राथमिकतामा रहेको ‘डिजिटल ट्रान्सफरमेसन’ को एजेन्डामा फिनल्यान्ड सरकारको विज्ञताको हिसाबले यो क्षेत्रमा पनि साझेदारी गर्ने इच्छा व्यक्त गरेका थिए।