काठमाडौँ। नेपाली कम्युनिस्ट पार्टी (नेकपा) ले आगामी मंसिरमा एकता राष्ट्रिय महाधिवेशनको घोषणा गरेको छ।

पार्टीका संयोजक पुष्पकमल दाहालको अध्यक्षतामा बसेको केन्द्रीय कार्य संयोजन समितिको बैठकले आगामी ११ देखि १५ मंसिरसम्म काठमाडौँमा महाधिवशेन गर्ने निर्णय गरेको हो।

आगामी साउन मसान्तसम्म पार्टी सदस्यता नवीकरण तथा सदस्यता विस्तार अभियान सञ्चालन गर्ने, १५ भदौसम्म वडा, १६ भदौदेखि मसान्तसम्म पालिका, असोज मसान्तसम्म जिल्ला र १५ कात्तिकसम्म प्रदेश अधिवेशन सम्पन्न गर्ने निर्णय गरेको प्रवक्ता प्रकाश ज्वालाले जानकारी दिए।

आगामी जेठ मसान्तभित्र केन्द्र, प्रदेश, जिल्ला, स्थानीय पालिका, वडा तथा टोल तहसम्मका सङ्गठनात्मक र पार्टी तथा जनवर्गीय/मोर्चा सङ्गठनहरूको एकीकरण तथा समायोजन गरिसक्ने प्रवक्ता ज्वालाद्वारा शनिबार जारी विज्ञप्तिमा जनाइएको छ।

पार्टीको वडादेखि केन्द्रसम्मका सबै कमिटी समानुपातिक र समावेशी मान्यताअनुसार निर्वाचित हुने र निर्वाचित कमिटीमा अनुभवी, प्रौढ र युवा तथा नवयुवाको समावेशीता रहनेछ। युवा र नवयुवाको प्रतिनिधित्व ५० प्रतिशतसम्म पुर्‍याइने पार्टीले जनाएको छ।

नेकपाले नेताहरू देवप्रसाद गुरुङ, प्रकाश ज्वाला, प्रेमबहादुर सिंह, रनध्वज लिम्बू, रेखा शर्मा, गणेश विश्वकर्मा, वरिष्ठ अधिवक्ताद्वय मुक्तिनारायण प्रधान र खिमलाल देवकोटा, अधिवक्ता जगदेव चौधरी, डम्बरविक्रम कार्की र रामबहादुर चौधरी रहेको संविधान संशोधन सुझाव कार्यदल गठन गरेको छ।

पार्टी एकीकरणपश्चात गठन भएको कार्यसंयोजन समितिको गत १९ चैतदेखि यही १४ वैशाखसम्म चलेको बैठकले पार्टीको अन्तरिम विधान-२०८२ अनुसार पार्टीको केन्द्रीय कार्यसमितिलाई पूर्णता दिने निर्णय गरेको प्रवक्ता ज्वालाले जानकारी दिए।