काठमाडौँ । विपद् जोखिम न्यूनीकरण तथा व्यवस्थापनसम्बन्धी राष्ट्रिय नीतिगत विषयमा छलफल र मन्थन गर्ने उद्देश्यसहित राष्ट्रिय स्वतन्त्र पार्टी (रास्वपा)ले विशेष कार्यक्रम आयोजना गर्ने भएको छ।

पार्टीको ‘पार्टी-संसद्-सरकार समन्वय समिति’को संयोजनमा आगामी वैशाख २७ गते उक्त नीति मन्थन कार्यक्रम सञ्चालन हुने भएको हो। समितिका संयोजक तथा पार्टीका महामन्त्री भूपदेव शाहका अनुसार विपद् व्यवस्थापनसँग सम्बन्धित नीतिगत सुधारका विषयमा गहन छलफल गर्ने उद्देश्यले कार्यक्रम तय गरिएको हो।

कार्यक्रम वैशाख २७ गते दिउँसो ३ बजेदेखि ६ बजेसम्म काठमाडौँस्थित नेपाल पर्यटन बोर्डको सभाहल, भृकुटीमण्डपमा आयोजना हुने छ। रास्वपाले कार्यक्रममा पार्टीका सबै केन्द्रीय विभाग प्रमुख तथा प्रतिनिधिहरूलाई सहभागिताका लागि अनुरोध गरेको जनाएको छ।