टोकियो। जापानको आधिकारिक तथ्यांकअनुसार मार्चमा रेकर्ड स्तरमा पुगेपछि अप्रिल महिनामा विदेशी पर्यटकको संख्या घटेको छ।

जापान नेसनल टुरिज्म अर्गनाइजेसनले बुधबार सार्वजनिक गरेको विवरणअनुसार अप्रिलमा जापान आउने अन्तर्राष्ट्रिय पर्यटकको संख्या अघिल्लो वर्षको तुलनामा ५.५ प्रतिशतले घटेर ३६ लाख ९० हजारमा झरेको छ।

यस गिरावटको मुख्य कारणमध्ये चिनियाँ पर्यटकको कमी हो। चीनबाट आउने पर्यटकको संख्या ५६.८ प्रतिशतले घटेर तीन लाख ३० हजार सात सयमा सीमित भएको छ। अधिकारीहरूका अनुसार यस गिरावटको कारण चीन सरकारको यात्रासम्बन्धी चेतावनी पनि हो।

मध्यपूर्वबाट आउने पर्यटकको संख्या पनि २१.४ प्रतिशतले घटेको छ। केही क्षेत्रमा जारी तनाव र युद्धका कारण यात्रा रद्द हुने क्रम बढेका छन्।

जापान र चीनबीचको सम्बन्ध पछिल्ला समयमा थप तनावपूर्ण बनेको बताइन्छ। नोभेम्बरमा जापानकी प्रधानमन्त्री सानाए ताकाइचीले ताइवानसम्बन्धी सम्भावित सैन्य संलग्नताको संकेत गरेपछि दुई देशबीच कूटनीतिक तनाव बढेको हो। चीनले ताइवानलाई आफ्नो भूभागको हिस्सा मान्दै आएको छ र आवश्यक परे बल प्रयोग गरेर पनि नियन्त्रणमा लिन सकिने धारणा राख्दै आएको छ।