बेइजिङ। चीनका विभिन्न भागमा यस हप्ता परेको मुसलधारे वर्षा र त्यसपछि आएको बाढीले कम्तीमा १२ जनाको ज्यान लिएको छ भने दशौँ हजार मानिसलाई सुरक्षित स्थानमा सार्न बाध्य बनाएको छ।

लगातारको वर्षाका कारण धेरै क्षेत्र डुबानमा परेपछि व्यापक उद्धार तथा निकासी अभियान सञ्चालन भइरहेको चिनियाँ सरकारी सञ्चारमाध्यमले जनाएका छन्। चीनको मध्य भागस्थित हुनान प्रान्तअन्तर्गत शिमेन काउन्टी सबैभन्दा बढी प्रभावित क्षेत्रमा परेको छ।

राज्य प्रसारणकर्ता सीसीटीभीका अनुसार सो क्षेत्रमा पाँच जनाको मृत्यु भएको छ भने ११ जना अझै बेपत्ता रहेका छन्। उद्धार टोलीहरूले प्रभावित क्षेत्रमा खोजी तथा राहत कार्य तीव्र पारेका छन्। चिनियाँ आधिकारिक समाचार संस्था सिन्ह्वाका अनुसार सोमबार बिहान ७ बजेसम्मको २४ घण्टामा मात्र शिमेन काउन्टीमा ३३९ मिलिमिटर (करिब १३ इन्च) वर्षा मापन गरिएको छ।

यसमध्ये एक सहरमा केही घण्टामै २४० मिलिमिटर (करिब ९ इन्च) वर्षा भएपछि ऐतिहासिक रेकर्ड नै तोडिएको अधिकारीहरूले जनाएका छन्।

बाढीका कारण हुनानसँगै नजिकैको हुबेई प्रान्त पनि गम्भीर रूपमा प्रभावित भएको छ। त्यहाँ केही सडकहरू नदीजस्तै बनेका छन् भने उद्धारकर्ताहरूले फसेका बासिन्दालाई इन्फ्लेटेबल डुङ्गा प्रयोग गरी सुरक्षित स्थानमा पुर्‍याएका छन्।

धेरै घरहरू डुबानमा परेका वा क्षतिग्रस्त भएका छन्। हुबेईमा तीन जनाको मृत्यु भएको र चार जना बेपत्ता रहेको पुष्टि गरिएको छ। दक्षिणपश्चिमी चीनको गुइझोउ प्रान्त पनि बाढीको चपेटामा परेको छ।

सीसीटीभीका अनुसार त्यहाँ चार जनाको मृत्यु भएको छ भने पाँच जना अझै बेपत्ता छन्। लगातार वर्षाका कारण केही क्षेत्रमा घरहरू डुबानमा परेका छन्, सडकहरू भत्किएका छन् र सञ्चार सेवा अवरुद्ध भएको छ। करिब तीन हजार ७०० भन्दा बढी मानिसलाई सुरक्षित स्थानमा सारिएको जनाइएको छ।

चीनमा यस्ता प्राकृतिक विपद् सामान्य मानिन्छन्। गत वर्ष जुलाईमा बेइजिङमा भएको भारी वर्षा र बाढीका कारण दर्जनौँ मानिसले ज्यान गुमाएका थिए।

यसैबीच, छुट्टै घटनामा दक्षिणी गुआङ्सी क्षेत्रमा शनिबार एउटा पिकअप ट्रक पुलबाट खस्दा १० जनाको मृत्यु भएको समाचार पनि सिन्ह्वाले जनाएको छ।