कास्की। गण्डकी प्रदेशका मुख्यमन्त्री सुरेन्द्रराज पाण्डेले प्रदेश सरकारले आगामी आव ०८३/८४ को बजेटमार्फत उद्योगी र व्यवसायीलाई मर्का पर्ने खालका विद्यमान नीति र कर प्रणालीमा सुधार गर्ने प्रतिबद्धता व्यक्त गरेका छन्।

गण्डकी प्रदेश आर्थिक मामिला मन्त्रालयद्वारा आज (आइतबार) आयोजित ‘समृद्ध प्रदेशका लागि प्रदेश सरकार र निजी क्षेत्र अन्तर संवाद’ कार्यक्रममा उनले कुन नीतिले काम गर्न अप्ठ्यारो भयो भन्ने विषयमा सुझाव दिन आग्रह गरे।

“गण्डकी प्रदेशमा सञ्चालन गर्न आएका उद्योगहरु बाहिर जान हुँदैन, लगानी आकर्षित गर्न सरकारले अभिभावकीय भूमिका खेल्छ‚” उनले भने, “निजी क्षेत्रका उद्योग वृद्धि र प्रोत्साहन गरे मात्र राज्यले आय वृद्धि हुन्छ।”

गण्डकी प्रदेशको विशिष्टतालाई ध्यानमा राख्दै सरकारले पहाडी भेगका लागि फरक खालका कानुन बनाउन लागेको उनको भनाइ थियो। पहाडी क्षेत्रको बाँझो जमिन उपयोग गर्न र स्थानीयलाई स्वरोजगार बनाउन घरेलु मदिराको ‘ब्रान्डिङ’ र गाँजाखेतीलाई कानुनी मान्यता दिने प्रक्रिया अन्तिम चरणमा पुगेको जानकारी पनि उनले दिए।

पर्यटन र पूर्वाधारको क्षेत्रमा ठूलो लगानी भित्र्याउन प्रदेश सरकारले आगामी बजेटपछि लगानी सम्मेलन गर्ने तयारीका साथै निजी क्षेत्रसँगको सहकार्यमा लगानीका क्षेत्रहरुको पहिचान गरिने उनको भनाइ थियो।

आर्थिक मामिलामन्त्री जितबहादुर शेरचनले गण्डकी प्रदेशको समृद्धिमा पर्यटन र कृषि उद्योग नै मुख्य आधार भएकाले प्रदेश सरकारले ती उद्योगलाई पहिलो प्राथामिकतामा राख्ने बताए। आगामी आवको बजेटलगत्तै गण्डकी प्रदेशमा लगानी सम्मेलन गर्ने तयारीमा रहेको जानकारी मन्त्री शेरचनले दिए।

पूर्वउद्योग तथा जलस्रोतमन्त्री हरि पाण्डेले प्रदेश सरकारले निर्वाध रूपमा उद्योग सञ्चालन गर्ने वातावरण सिर्जना गरेको खण्डमा गण्डकी प्रदेशमा उद्योग सञ्चालन बढ्ने धारणा राखे।

त्यस अवसरमा उद्योगी तथा व्यवसायीहरूले लगानीमैत्री वातावरण निर्माण गरिए थप लगानीका लागि आफूहरू तयार भएको बताए।

नेपाल उद्योग वाणिज्य महासङ्घका उपाध्यक्ष नरेशमान श्रेष्ठले उद्योग व्यवसाय सञ्चालन गर्न सरकारी प्रक्रिया झन्झटिलो, मजदुर समस्या र सरकारको निजी क्षेत्रप्रति हेर्ने दृष्टिकोणका पनि राम्रो नभएको धारणा राखे।

उद्योगी दीपक सापकोटाले सरकारले उद्योग खोल्न र सहज रुपमा सञ्चालन गर्ने वातावरण सिर्जना गर्न आवश्यक भएको बताए। उद्योगी एवं मणिपाल शिक्षण अस्पतालका सञ्चालन नारायण पौडेलले पोखराको गण्डकी प्रदेशको समृद्धिका लागि पर्यटन र कृषि उद्योग प्रमुख मानिने बताउँदै पोखरामा पर्यटन क्षेत्रमा लगानी गर्न देशभरिका उद्योगी इच्छुक भएको बताए।

उद्योगी एवं हाइड्रोपावर व्यवसायी पुष्पज्योति ढुङ्गानाले सरकारी नीति, मजदुर आन्दोलन र स्थानीयको अवरोध कारण उद्योग व्यवसाय सञ्चालनमा कठिनाइ उत्पन्न हुने गरेको बताए।