काठमाडौँ
००:००:००
२० जेष्ठ २०८३, बुधबार
काठमाडौँ। काठमाडौँमा एभरेस्ट टुरिजम अवार्ड २०२६ भव्य रूपमा सम्पन्न भएको छ।
पूर्वराष्ट्रपति रामवरण यादवको प्रमुख आतिथ्यमा भएको कार्यक्रममा सन् १९७५ मा दक्षिण-पश्चिम मार्गबाट सगरमाथाको शिखरमा पहिलो सफल आरोहण टोलीसँगै पुगेर इतिहास रचेका पेर्टेम्बा शेर्पालाई ‘लाइफ टाइम अचिभमेन्ट अवार्ड’ बाट सम्मान गरिएको छ। पूर्वराष्ट्रपति यादवले शेर्पालाई पर्यटन क्षेत्रमा पुर्याएको अमूल्य योगदानको कदर गर्दै उक्त अवार्डसहित ५१ हजार १५१ रुपैयाँ, दोसल्ला र प्रमाणपत्र प्रदान गरी सम्मान गरे।
यसैगरी सामाजिक योगदान मानवता सेवा तथा शान्ति स्थापनाका प्रयासहरूको कदर गर्दै प्रदान गरिएको प्रतिष्ठित ‘पिस हिरो अवार्ड २०२६’ पप्पु यादव (राजेश रञ्जन) लाई प्रदान गरियो।
त्यसैगरी एभरेस्ट टुरिजम अवार्ड २०२६ अन्तर्गत विभिन्न व्यक्तित्वलाई एभरेस्ट टुरिजम सम्मान प्रदान गरिएको छ। सम्मानित हुनेहरूमा यज्ञप्रसाद गौतम, सुनारबहादुर गुरुङ, विटिद्नान रोजानापनिच (थाइल्यान्ड), बुद्धिनारायण श्रेष्ठ र जोआओ गार्सिया (पोर्चुगल) छन्।
साथै ‘साहसिक पर्यटन उत्कृष्टता अवार्डबाट (पर्वतारोहण)’ अन्तर्गत प्रिन्स फैसल अल साउद (साउदी अरब), निकोल कोवाल्चुक (रूस), पुरुषोत्तम सानु, कल्पना महर्जन, कुञ्जाङ छोपेल शेर्पा, एड्रियाना ब्राउनली (बेलायत), जो हार्भे (अस्ट्रेलिया), किशोर साही (क्यानियोनिङ), आङछिरिङ शेर्पा, सानोबाबु सुनुवार (प्याराग्लाइडिङ) लगायतलाई सम्मान गरिएको छ।
यसैगरी ग्लोबल माउन्टेनियरिङ एक्सिलेन्स अवार्ड निर्मल पुर्जालाई प्रदान गरिएको छ भने टुरिज्म एक्सिलेन्स पर्सनालिटी अवार्डअन्तर्गत रवि शर्मा आर्याल, रमेशराज कुँवर, बेलायतका एन्ट मिडलटन तथा कलाकार अनमोल केसी, कविता नेपाली र नीलम पौडेललाई सम्मान गरिएको छ।
स्लोभेनियाका पर्वतारोही भिक्टर ग्रोशेल्ज, रेस्क्यु पेम्बा फ्रेन्च शेर्पा, पोखरा अल्ट्रा लाइट, काठमाडौँ वातावरण शिक्षा परियोजना, नेपाल पर्वतारोहण संघ (नेपाल माउन्टेनियरिङ एसोसिएसन), द्वारिकाज होटेल, रमेश सापकोटा (वेलनेस), रोसा टुर एन्ड ट्राभल्स, अशोक लामा (रेस्क्यु), मानशान्त घिमिरे (वन्यजन्तु), रामजीबहादुर श्रेष्ठ (स्पोर्ट्स), नारायण भण्डारी (जर्नालिज्म) तथा द क्लिफ नेपाल (बन्जी एक्सिलेन्स) लगायत विभिन्न संस्था तथा व्यक्तिलाई पनि अवार्ड प्रदान गरिएको छ।
कार्यक्रममा पूर्वराष्ट्रपति यादवले हिमाल संरक्षणको अत्यन्तै आवश्यकता रहेको औँल्याए। उनले भने, “यो देशमा हामीले हिमाल बचाउनुपर्छ। यदि हामीले हिमाल बचाएनौँ भने हाम्रो पृथ्वीको अस्तित्व नै रहँदैन। त्यसैले हामी सबै-तपाईं, हामी सबै मिलेर विश्व एकजुट भएर हिमाल बचाउनुपर्छ।”
उनले जलवायु परिवर्तन र हिमाल संरक्षणमा विश्व समुदाय एकजुट भएर काम गर्नुपर्ने आवश्यकता रहेकोसमेत जोड दिए।
कार्यक्रममा प्रमुख अतिथि, विशिष्ट अतिथि, अतिथि तथा सम्पूर्ण सहभागीहरूलाई आयोजक संस्थाकी अध्यक्ष सत्यकला लामाले हृदयदेखि धन्यवाद व्यक्त गर्दै कार्यक्रम सफल बनाउन सहयोग गर्ने सबैप्रति आभार प्रकट गरिन्।
