माल्दिभ्स। माल्दिभ्सका राष्ट्रपति मोहम्मद मुइजुले माल्दिभ्स सरकारले १६ वर्षमुनिका बालबालिकाहरूलाई साइबर अपराध र अन्य खतराहरूबाट जोगाउन विभिन्न सामाजिक सञ्जालमा पहुँच प्रतिबन्ध लगाउने घोषणा गरेको बताएका छन्।

साप्ताहिक पत्रकार सम्मेलनमा सोमबार बोल्दै मुइजुले अनलाइन तथा साइबर अपराधबाट बालबालिकाहरूलाई जोगाउनु स्वदेश तथा विदेशमा रहेका अभिभावकहरूका लागि प्रमुख चिन्ताको विषय बनेको बताएका छन्।

सरकारले नयाँ साइबर नीति तयार गर्दा अस्ट्रेलियासहित अन्य देशहरूमा लागु गरिएका नियमहरूको अध्ययन गर्ने उनले बताएका छन्।

प्रस्तावित प्रतिबन्धले बालबालिकाका लागि जोखिमपूर्ण मानिने सामाजिक सञ्जालको प्रयोगहरूलाई लक्षित गर्ने मुइजुले बताएका छन्।

सरकारले सान्दर्भिक प्रविधि कम्पनीहरूसँग परामर्श गर्ने र सामाजिक सञ्जालका मालिकहरूसँग उनीहरूको सेवाहरू माल्दिभ्सको कानुनअनुरूप सम्भव बनाउन समन्वय गर्ने जनाएको छ।

राष्ट्रपति मुइजुका अनुसार यस उपाय र सतर्कताका लागि विद्यमान साइबर सुरक्षा कानुनमा संशोधन आवश्यक पर्नेछ।

प्रतिबन्धहरूले बालबालिकाको शिक्षा वा अनलाइनबाट सिक्ने क्षमतामा बाधा नपुग्ने तर सुरक्षित डिजिटल वातावरण सिर्जना गर्न मद्दत गर्ने मुइजुले प्रस्ट पारेका छन्।

सरकारले निर्धारित नियमहरूलाई छिटै अन्तिम रूप दिने र सार्वजनिक परामर्शपछि एक वर्षभित्र पूर्ण प्रतिबन्ध लगाउने लक्ष्य राखेको पीएसएम न्युजले जनाएको छ।