काठमाडौँ। शिक्षा मन्त्रालयले विद्यालय शिक्षाको राष्ट्रिय पाठ्यक्रम परिमार्जनको तयारी गरेको छ।

प्रतिनिधिसभा बैठकमा बिहीबार आफ्नो मन्त्रालयको विनियोजन विधेयकमाथिको छलफलमा उठेका प्रश्नको जवाफ दिँदै शिक्षा तथा खेलकुदमन्त्री सस्मित पोखरेलले विद्यालय शिक्षाको राष्ट्रिय पाठ्यक्रम प्रारूपको परिमार्जनका लागि कार्यदल गठन गरी कार्य अगाडि बढाइसकेको जानकारी दिए।

प्रारूप कार्यान्वयनमा आएपछि परिवर्तित सन्दर्भअनुरूप विद्यालय शिक्षामा सुधार हुने कुरामा सरकार विश्वस्त रहेको उनले बताए। उनले विद्यार्थी संख्या अत्यन्तै न्यून भएका विद्यालय भौगोलिक दूरी र अन्य विभिन्न आधारमा गाभ्ने वा तह घटाउनेजस्ता विषय आगामी आवका लागि प्रस्तावित विद्यालय नक्सांकन, पुनर्संरचनालगायत विषयमा आवश्यक कदम चालिने उल्लेख गरे।

न्यून विद्यार्थी भएकै आधारमा विद्यालय गाभेर एकजना विद्यार्थीको मात्र पनि शिक्षा पाउने अधिकार सरकारले कुण्ठित नगर्ने उनले स्पष्ट पारे।

उनले आगामी वर्ष सबै सामुदायिक विद्यालयको भौतिक पूर्वाधारलगायत सम्पूर्ण पक्षमा विस्तृत सर्वेक्षण गरी प्रतिवेदन तयार पारिने र सो प्रतिवेदनका आधारमा विद्यालयको भौतिक पूर्वाधार विकासलगायत कार्यमा बजेट व्यवस्थापन गर्दै लगिने धारणा राखे।

विद्यालय शिक्षासम्बन्धी नयाँ ऐन तथा नियमावली शिक्षक विद्यार्थी अनुपातको मापदण्ड तय गरिनेसमेत उनले जानकारी दिए।

मन्त्री पोखरेलले विगतमा आवश्यकताअनुसार शिक्षक तथा कर्मचारीको दरबन्दी व्यवस्थापन नगरी काम चलाउ र तत्कालको समस्या समाधानका लागि मात्रै निर्णय हुने गरेकाले अहिले समस्या देखिएको बताए। मन्त्री पोखरेलले एसियाली खेलमा स्वर्ण पदक प्राप्त खेलाडीलाई नेपाल सरकारबाट मासिक रूपमा आजीवन भत्ताको व्यवस्था गरिएको समेत जानकारी दिए।