काठमाडौँ। काठमाडौँ महानगरपालिकाले त्रिवि शिक्षण (टिचिङ) अस्पताललाई सहयोग गरेको छ। महानगरले महाराजगन्जमा रहेको शिक्षण अस्पतालको ओपीडी सेवा बिरामीमैत्री बनाउन एक करोड ७० लाख रुपैयाँबराबरका प्रविधि, साधन तथा उपकरण हस्तान्तरण गरेको हो।

अस्पतालमा बिहीबार आयोजना गरिएको औपचारिक कार्यक्रममा महानगरपालिकाका कार्यवाहक प्रमुख सुनीता डंगोलले, अस्पतालका प्रमुख प्राध्यापक डा. सुवास आचार्यलाई हस्तान्तरण गरिन्।

यसरी प्रदान गरिएका प्रविधि, साधन तथा उपकरणहरुमा शुल्क भुक्तानी गर्न सकिने, रिपोर्ट बिरामी आफैँले प्रिन्ट गर्न सक्ने, उपचारका लागि घरबाटै पैसा डिपोजिट गर्न सकिने सुविधा भएका १६ वटा इन्टर्‍याक्टिभ किओक्स मेसिन, रिपोर्ट तथा परीक्षणलगायत उपचारसँग सम्बन्धित सबै विवरण एकै ठाउँमा हेर्न सकिने ६५ वटा अल इन वन डेक्सटप छन्। यस्तै चुस्त सेवाका लागि सर्भर र र्‍यामको क्षमता वृद्धि गरिएको छ। यसरी प्रदान गरिएको प्रविधि, साधन र उपकरणहरू सार्वजनिक खरिद प्रक्रियाबाट एक करोड ७० लाख १६ हजार ६७० रुपैयाँमा प्राप्त भएका हुन्।

उपकरण हस्तान्तरण गर्दै कार्यवाहक प्रमुख डंगोलले, सरकारी अस्पतालहरूमा उपचार गराउन घण्टौँसम्म लाइन बसिरहनु पर्ने, पैसा तिर्न लामो लाइनमा बसेर समय खर्च गर्नुपर्ने अवस्था अन्त्य गरेर नागरिकलाई सहज स्वास्थ्य सेवाको पहुँच बढाउन अस्पताललाई सहयोग गरिएको बताइन्। “बिरामी र बिरामीका आफन्तलाई त्यत्तिकै पनि पीडा भइरहेको हुन्छ। उहाँहरूलाई उपचार गराउने क्रममा झन पीडा र सकस नहोस्। पैसा तिर्न र ओपीडीको टिकट काट्न घण्टौँ लाइनमा बस्नु नपरोस्। यसलाई प्रविधिको प्रयोगबाट सुधार गर्न सम्भव छ। यसका लागि हाममीले सहयोग गरेका हौँ।”

डंगोलले आजको दिन विशेष रहेको पनि बताइन्। उनले भनिन्‚ “हामीले उपलब्ध गराएको सहयोगबाट सर्वसाधारणलाई सेवा लिन सहज हुनेछ। यसकारण अस्पतालसँगको सहकार्यलाई हामीले विशेष मानेका छौँ। हामीले आजको दिनलाई विशेष ठानेका छौँ।” महानगरपालिकाको संस्थागत जगको कुरा गर्दै उनले सहर सफा गर्ने दायित्व दिएर स्थापना गरिएको अड्डा अहिले पूर्वाधार विकास, स्वास्थ्य‚ शिक्षा, वातावरण, आर्थिक तथा सामाजिक विकास, सम्पदा तथा पर्यटनसहित नागरिकसँग जोडिएका सबै सेवा प्रदान गर्ने स्थानमा पुगेको उनको भनाइ छ। अस्पतालसँगको सहकार्यमा टेली सर्भिस सञ्चालन गर्न सकिने पनि डंगोलले बताइन्। “स्थानीय सरकारका हैसियतले महानगरपालिका हरेक नागरिकसँग जोडिएका सवालमा संवेदनशील छ। नागरिकका आवश्यकतालाई महसुस गरेर काम सम्पादन गर्छ‚” उनले भनिन्।

सरकारी अस्पतालमा उपचार गराउन जाँदा लाइन बस्नु नपर्ने प्रणाली बनाउन हाम्रो सहयोग हो : कार्यवाहक प्रमुख सुनीता डंगोल

त्यस क्रममा अस्पतालका प्रमुख प्रा. डा. आचार्यले महानगरपालिकाबाट प्रदान गरिएको प्रविधि, जडान गरिएका साधन तथा उपकरणको प्रयोगका विषयमा प्रस्तुतीकरण गरेका थिए। उनले बिरामीमैत्री सेवा व्यवस्थापनमा महानगरपालिकाबाट प्राप्त सहयोगले रूपान्तरण गर्न सम्भव भएको उल्लेख गरे। “पहिलो चरणको सहयोगबाट महसुस गर्न सकिने सेवा दिन सकिएको छ। दोस्रो चरणमा पनि सहयोग हुने अपेक्षा गरेका छौँ। यसपछि अस्पतालबाट प्रदान गरिने क्यान्सर उपचारका अधिकांश सेवालाई पेपरलेस र फेसलेस बनाउन सकिन्छ।”

अस्पतालका प्रमुख प्राध्यापक डा. सुवास आचार्य

कार्यक्रममा अस्पतालका उपनिर्देशक प्रा. डा. पवनराज चालिसे र प्रा. डा. गोपाल सेढाईंले, महानगरपालिकाबाट अस्पतालले नियमित सहयोग प्राप्त गरिरहेको बताउँदै यो सहयोगबाट अस्पतालको सेवा व्यवस्थापनमा सहज भएको धारणा राखे। कार्यक्रममा उनीहरूले महानगरपालिकाबाट नियमित साथ आवश्यक रहेको उल्लेख गरे।

महानगरपालिकासँगै वडा कार्यालयले पश्चिम क्षेत्रबाट अस्पताल आउने मार्ग खुलाउन सहयोग गरेको वडाध्यक्ष प्रेम थापाले जानकारी दिए।

महानगरपालिकाले स्वास्थ्य प्रवर्द्धन केन्द्रहरूबाट प्रवाह हुने विशेषज्ञ स्वास्थ्य सेवाका लागि अस्पतालसँग थप सहकार्यको योजना रहेको स्वास्थ्य विभागका प्रमुख दीपककुमार केसीले जानकारी दिए। “अस्पतालको सेवा व्यवस्थापनमा महानगरपालिकाको हक लाग्ने गरी सहयोग प्रदान गरेका छौँ। यसबाट महानगरवासीलाई लाभ हुनेछ‚” केसीले भने।

महानगरपालिकाले कोभिड १९ रोकथाम तथा नियन्त्रणका लागि भेन्टिलेटर मेसिनहरू, त्यसपछि सिटी स्क्यान मेसिन, अस्पतालको बेड‚ क्यु सिस्टम व्यवस्थापन प्रणालीलगायत सहयोग उपलब्ध गराएको छ।