वासिंटन। अमेरिकाको एरिजोनाको पहाडी क्षेत्रमा शुक्रबार एक निजी हेलिकोप्टर दुर्घटना हुँदा चारजनाको मृत्यु भएको छ।
पिनल काउन्टी सेरिफको कार्यालयले सामाजिक सञ्जाल फेसबुकमा राज्यको राजधानी फिनिक्स नजिकैको सुपिरियर सहरनजिकै हेलिकोप्टर दुर्घटना भएको बताएको छ।
“दुर्घटना बिहान ११ बजेतिर भएको थियो‚” सेरिफको कार्यालयले जनाएको छ।
उद्धारकर्मीहरूले हेलिकोप्टरको भग्नावशेषमा पुगे र दुर्घटनामा सवार सबै चारै जनाको मृत्यु भएको पुष्टि गरे।
मृत्यु हुनेमा हेलिकोप्टर चालक र एउटै परिवारका तीन महिला सदस्य रहेको जनाइएको छ।
अमेरिकी एभिएसन एडमिनिस्ट्रेसन र राष्ट्रिय यातायात सुरक्षा बोर्डद्वारा अनुसन्धान जारी रहेको सेरिफको कार्यालयले जनाएको छ। -सिन्ह्वा
