काठमाडौं। ट्राफिक प्रहरीले काठमाडौं उपत्यकामा आज सात हजार ९८७ पैदलयात्रीलाई सुरक्षित तरिकाले जेब्राक्रसिङबाट बाटो काट्न सिकाएको छ।

दुर्घटना न्यूनीकरण विशेष अभियानअन्तर्गत प्रहरीले आज (बिहीबार) थप स्कुल/कलेजका ६६ विद्यार्थीलाई सचेतना‚ एक हजार ५१२ जनालाई रात्रिकालीन विशेष सचेतना‚ पाँच हजार ३१५ जना दुईपाङ्ग्रे तथा चारपाङ्ग्रे सवारी साधनका चालकलाई सचेतना कार्यक्रम‚ दुई हजार ७४७ चालक तथा यात्रुलाई सुरक्षित यात्राको कामना‚ तीन हजार ६१४ जनालाई यात्रुसँग सचेतनामूलक कार्यक्रम गरेको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीले बताए।

त्यसैगरी १५ वटा ट्राफिक कोणमा सरसफाइ‚ २०७ जनालाई मस्कटसहित सडक नाटक प्रदर्शन‚ १४० जनालाई आरक्षण सिट यात्रुमैत्री व्यवहार‚ सरसफाइ कार्यक्रममा संलग्न १४ जना‚ सडक दुर्घटनामा दिवङ्गत भएका व्यक्तिहरुको सम्झनामा दीप प्रज्ज्वलन कार्यक्रममा २९० जना सहभागी भएका छन्।

२१ जना दुर्घटना पीडित घाइतेसँग भेटघाट‚ १२५ जनालाई आकाशे पुलबाट बाटो काट्न सिकाइएको‚ ३० चालकलाई लागुपदार्थ सेवन गरे/ नगरेको जाँच‚ २३ हजार ७०३ जना सडक प्रयोगकर्ता आजको विशेष सचेतना अभियानबाट लाभान्वित भएका छन्।

साथै १५ हजार ३७ जनालाई पर्चापम्प्लेट वितरण तथा नो हर्नलगायतका स्टिकर चार हजार ९६४ वटा स्टिकर टाँस गरेको छ। ‘सभ्य नागरिकको चिनारी‚ सडक दुर्घटना न्यूनीकरण हामी सबैको जिम्मेवारी’ भन्ने नाराका साथ गत २६ गतेदेखि सुरु भएको ट्राफिक सप्ताह आगामी माघ ३ गतेसम्म सञ्चालन हुनेछ।

यो अभियानमा एक हजार ६३५ जना ट्राफिक स्वयंसेवक परिचालन‚ सडकमा हुने सानो लापरबाहीले ठूलो दुर्घटनाको रुप लिनसक्छ भन्ने यथार्थलाई आत्मसात् गरी सुरक्षित सडक संस्कारको विकास गर्दै सडक दुर्घटनाबाट हुने जनधनको क्षतिलाई न्यूनीकरण गर्ने उद्देश्यले ट्राफिक सप्ताहको आयोजना गरिएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीले बताए।