काठमाडौँ। प्रधानमन्त्री सुशीला कार्कीले कोसी प्रदेशको निर्वाचन तयारी र सुरक्षा अवस्थाबारे जानकारी लिएकी छन्।

उनले कोसीका निर्वाचनसँग सम्बद्ध अधिकारी र सुरक्षा प्रमुखसँग बिहीबार जानकारी लिएकी हुन्। सोलुखुम्बु र भोजपुरको भ्रमण सकेर सुनसरीको इटहरी पुगेपछि कार्कीले समग्र कोसी प्रदेशको अवस्थाबारे छलफल गरेको उनको सचिवालयले जनाएको छ।

छलफलमा कोसी प्रदेशका प्रमुख सचिव राजेन्द्रकुमार पौडेल, प्रहरीका नायब महानिरीक्षक विनोद घिमिरे‚ विभिन्न जिल्लाका मुख्य निर्वाचन अधिकृत, सेना, सशस्त्र, राष्ट्रिय अनुसन्धान विभागका अधिकारीहरू तथा प्रमुख जिल्ला अधिकारीहरूको उपस्थिति थियो।

कार्यक्रममा पूर्वी पृतना मुख्यालयका पृतनापति उपरथी गौरवकुमार केसीले कोसीको सुरक्षा अवस्था र निर्वाचनलक्षित योजनाका विषयमा प्रस्तुतीकरण दिएका थिए। प्रधानमन्त्री कार्कीले निर्वाचनका लागि भएको तयारीको प्रशंसा गर्दै आउँदा दिनमा पनि सबै निकायबीच समन्वयका साथ अघि बढ्न र चुस्त-दुरुस्त व्यवस्थापन गर्न निर्देशन दिइन्।

“छोटो समयमा तपाईंहरूले राम्रो काम गर्नुभएको छ। यो सबैको समन्वयात्मक र एकीकृत प्रयासको प्रतिफल हो। मैले आज जे जति जानकारी पाएँ र आफ्नै आँखाले पनि देखेपछि लाग्यो कि अब जनताले मत हाल्न मात्र बाँकी छ‚” उनले भनिन्‚ “बाँकी सारा तयारी सकियो। आउँदा दिनमा पनि सबै सुरक्षा निकायबीच यस्तै एकताबद्ध र समन्वयात्मक रूपमा अघि बढ्नुहोस्। यसको प्रतिफल राम्रो आउनेछ र देशले पनि निकास पाउनेछ।’

साथै उनले कुनै तत्त्वले निर्वाचनको वातावरण बिगार्न खोजेमा तत्कालै त्यस्ता तत्त्वलाई निरुत्साहित गर्न पनि निर्देशन दिइन्। उनले भनिन्‚ “सामाजिक सञ्जाल वा अन्य जुनसुकै माध्यमबाट पनि कसैले वातावरण बिगार्न खोज्लान्। त्यस्ता तत्त्वलाई पहिचान गरी तत्काल निरुत्साहित गर्नुहोस्। यसमा कुनै सम्झौता नगर्नुहोस्। यतिखेर देशले निकास पाउन निर्वाचनभन्दा ठुलो कुरा अर्को कुनै छैन।”

यसअघि उनले सोलुखुम्बुका नाम्चे र सल्लेरी तथा भोजपुर सदरमुकाममा पनि निर्वाचनको तयारी र वस्तुस्थितिबारे जानकारी लिएकी थिइन्।

कोसी प्रदेशका १४ जिल्लामा २८ निर्वाचन क्षेत्रका लागि निर्वाचन हुँदै छ। कोसी प्रदेशमा निर्वाचनका लागि ५१ हजार आठ सयभन्दा बढी सुरक्षाकर्मी परिचालन गरिँदै छ।