सर्लाही। सर्लाहीमा मतदान अधिकृतका रूपमा खटिएका एक स्वास्थ्यकर्मीको ड्युटीमै रहेकाबेला मृत्यु भएको छ।

जिल्ला प्रहरी कार्यालय सर्लाहीका प्रवक्ता डीएसपी सरोजकुमार राईका अनुसार मृत्यु हुनेमा रौतहट माधवनारायण नगरपालिका ६ का ४२ वर्षीय सिनियर अहेब रघुनाथ महतो छन्।

उनी सर्लाही बरहथवा नगरपालिका ५ स्थित आधारभूत स्वास्थ्य केन्द्र बरहथवामा कार्यरत थिए।

सर्लाहीको पर्सा गाउँपालिका ४‚ जिगडवास्थित जिगडवा आधारभूत विद्यालयमा रहेको मतदान केन्द्रमा मतदान अधिकृतका रूपमा कार्यरत रहेका बेला मंगलबार दिउँसो २ बजे उनी अचानक बेहोस भएका थिए।

बेहोस भएपछि उनलाई उपचारका लागि प्रादेशिक अस्पताल मलंगवामा पठाइएको थियो। अस्पतालमा उनलाई चिकित्सकले साढे २ बजे मृत घोषणा गरेका थिए।

घटनास्थल जिल्ला प्रहरी कार्यालय सर्लाहीबाट करिब १० किलोमिटर पूर्व पर्छ। घटनाबारे थप अनुसन्धान भइरहेको प्रहरीले जनाएको छ।