काठमाडौँ। प्रधानमन्त्री सुशीला कार्कीले लैंगिक समानता, लोकतान्त्रिक मूल्य र सामाजिक न्यायको संस्कृतिलाई अझ सुदृढ बनाउन हातेमालो गर्न आह्वान गरेकी छन्।

अन्तर्राष्ट्रिय महिला दिवसका अवसरमा आइतबार शुभकामना व्यक्त गर्दै उनले अझै धेरै महिला गुणस्तरीय शिक्षा, आधारभूत स्वास्थ्य सेवा, सम्मानजनक रोजगारी र नेतृत्व तहमा सार्थक सहभागिताबाट वञ्चित भएको उल्लेख गरिन्।

उनले भनेकी छन्, ‘उनीहरूलाई अझै विश्वास गरिहाल्ने र भन्ने मनोविज्ञान ज्युँका त्युँ छ। हिजो चुलाचौकामा बेहोरेको विभेदको नयाँ स्वरूप आज कार्यस्थलमा छ।’

अबको लक्ष्य केवल सहभागिता बढाउने मात्र होइन, अर्थपूर्ण र गुणस्तरीय सहभागिता सुनिश्चित गर्नुपर्ने उनको भनाइ छ। ‘अहिले शिक्षाको विस्तार भएको छ, चेतनाको स्तर उठेको छ। त्यसैले महिला अधिकारका लागि अझ दृढताका साथ अगाडि बढिरहेका छन्। हामीले यो पनि बुझ्नुपर्छ कि सबै महिलाको अवस्था समान छैन,’ सन्देशमा भनिएको छ।

उनले समाजमा पछि परेको, विकासको मूलधारबाट वञ्चित समुदायका महिला अझै बढी प्रताडित भएको पनि उल्लेख गरेकी छन्। उनले विशेषगरी दलित महिला, कर्णालीका महिला, मधेसका महिला तथा सीमान्तीकृत समुदायका महिलाको आवाज राज्यको नीतिनिर्माणमा अझ स्पष्ट रूपमा प्रतिविम्बित हुन आवश्यक रहेको बताएका छन्।

प्रधानमन्त्री कार्कीले समानता, सशक्तीकरण र सामाजिक न्यायका आधारमा समतामूलक समाज निर्माण गर्नु आजको ऐतिहासिक दायित्व भएको र त्यो दायित्व राज्यको मात्र नभई राजनीतिक दलहरू, नागरिक समाज, निजी क्षेत्र, सञ्चार जगत्, राष्ट्रिय तथा अन्तर्राष्ट्रिय विकास साझेदारको साझा जिम्मेवारी भएको उल्लेख गरेकी छन्।

उनले भनेकी छन्, ‘जब महिलाले सम्मान, सुरक्षा र समान अवसर प्राप्त गर्नेछन्, तब मात्र लोकतन्त्र सुदृढ हुन्छ। तब मात्र संविधानको मर्म कार्यान्वयन हुन्छ। तब मात्र समृद्ध, न्यायपूर्ण र समतामूलक नेपाल निर्माण सम्भव हुन्छ।’

नारी दिवसले सबै जनामा समानता, न्याय, समावेशिता र लोकतान्त्रिक चेतनालाई अझ सशक्त बनाओस् भन्ने शुभकामना पनि उनले दिएकी छन्।