झापा। पूर्वीनाका काँकडभिट्टाबाट विभिन्न देशका सात हजार ६४२ पर्यटक नेपाल भित्रिएका छन्।

अध्यागमन कार्यालयका अनुसार चालु आव ०८२/८३ को नौ महिनामा यत्ति पर्यटक भित्रिएका हुन्।

साउनदेखि चैतसम्म ८१ मुलुकका पर्यटकले यो नाका हुँदै नेपाल आएका कार्यालयका प्रमुख तुलसी भट्टराईले जानकारी दिए। नेपाल प्रवेश गरेका पर्यटकमध्ये सबैभन्दा बढी भुटानी छन्। उक्त अवधिमा चार हजार १५४ भुटानी पर्यटक नेपाल आएका छन्।

कार्यालयको अभिलेखअनुसार भुटानपछि अमेरिका, थाइल्यान्ड, अस्ट्रेलिया र बेलायतका पर्यटक धेरै आएका छन्। अमेरिकाबाट एक हजार ६१२, थाइल्यान्डबाट ५२५, अस्ट्रेलियाबाट २२९ र बेलायतबाट १८२ नागरिक नेपाल घुम्न आएका कार्यालयका प्रमुख भट्टराईले बताए। नेपाल आउने पर्यटकले लुम्बिनी, पोखरा, काठमाडौँ, चितवन, गोर्खालगायत प्रमुख पर्यटकीयस्थल जाने बताउने गरेको उनले जानकारी दिए।

आउने मात्र नभएर पर्यटकले नेपालबाट अर्को मुलुक प्रस्थान गर्नसमेत यो नाका प्रयोग गर्दै आएका छन्। सोही अवधिमा काँकडभिट्टा नाका भएर नौ हजार ९४२ पर्यटक यहाँबाट बाहिरिएको तथ्यांक छ।

आव ०८१/८२ को साउनदेखि चैतसम्ममा भने यहाँबाट आठ हजार ७० पर्यटक भित्रिएका थिए। चालु आवको सोही अवधिमा आगमन भएका पर्यटकको सङ्ख्यामा ४२८ ले कमी आएको छ।

चालु आवको चैत महिनामा यो नाका भएर एक हजार ६ जना पर्यटक नेपाल प्रवेश गरेको र एक हजार ५४३ जना प्रस्थान गरेको कार्यालयले जनाएको छ। यस अवधिमा ६ हजार ६९१ पर्यटक भिसा, १२४ नातेदार भिसा, २६ वैवाहिक भिसा र ३६ वटा गैरआवासीय भिसा जारी गरिएका छन्। भिसा जारी गरेबापत दुई करोड ८० हजार ५२० रुपैयाँ राजस्व संकलन भएको कार्यालयले जनाएको छ।