काठमाडौँ। शिक्षा तथा खेलकुद मन्त्रालयले विद्यालय शिक्षा क्षेत्र योजना ‘स्कुल एजुकेसन सेक्टर प्लान’(एसईएसपी) योजनाको समीक्षा बैठक प्रारम्भ गरेको छ।

आगामी आवको बजेट निर्माणको प्रक्रिया चलिरहेको सन्दर्भमा मन्त्रालयले दातृनिकायहरूसँग सञ्चालित एसईएसपी कार्यक्रमको प्रगित तथा बजेट समीक्षा गर्दै आगामी दिनमा शिक्षा क्षेत्रमा लिनुपर्ने पहलकदमीबारे छलफल गरेको हो।

पाँच दिनसम्म चल्ने बजेट समीक्षा बैठकमा शिक्षा मन्त्रालय, मन्त्रालयअन्तर्गतका शिक्षा तथा मानव स्रोत विकास केन्द्र, पाठ्यक्रम विकास केन्द्रलगायत विभिन्न निकाय तथा एसईएसपीमा सहयोग गर्ने विकास साझेदारहरूको सहभागिता छ।

मन्त्रालयका सचिव चूडामणि पौडेलको अध्यक्षता सुरु भएको पहिलो दिनको बैठकमा विकास साझेदारको संयोजक युरोपेली संघ (ईयू) को नेतृत्वमा आठवटा संयुक्त साझेदार र अन्य विकास साझेदारहरू बेलायत, इयू, फिनल्यान्ड, नर्वे, संयुक्त राष्ट्रसंघीय नियोग (युनिसेफ), एसियाली विकास बैंक, विश्व बैंकलगायतको उपस्थिति थियो।

उद्घाटन सत्रमा विभिन्न देशका राजदूत र एजेन्सी प्रमुखहरूले आ-आफ्ना तर्फबाट शिक्षा क्षेत्रमा रहेका कार्यक्रमबारे प्रकाश पारे। एसईएसपीमा लगानी साझेदारी गर्ने विकास साझेदार निकायका प्रमुखहरूले आजै मन्त्री सस्मित पोखरेलसँग भेटवार्ता गरी दुइपक्षीय हितका साथै विभिन्न निकायहरूले नेपालको शिक्षा क्षेत्रमा पुर्याउँदै आएको सहयोगको विषयमा छलफल भएको थियो। भेटमा विकास साझेदार निकायले नेपालको शिक्षा क्षेत्रमा गरिरहेको सहयोगलाई निरन्तरता दिने प्रतिबद्धता जनाएका थिए।

बैठकको उद्घाटन सत्रमा सचिव पौडेलले शिक्षा क्षेत्रमा सरकार र विकास साझेदारको संयुक्त प्रयासबाट धेरै उपलब्धि हासिल गर्न सफल भएको बताए। तथापि विद्यालयमा आधारभूत तहमा विद्यार्थीको सिकाइ तथा शिक्षा क्षेत्रमा प्रविधिको प्रयोगलाई अझै प्राथमिकता दिनुपर्ने आवश्यक उनले औँल्याए। साथै उनले तीन तहको सरकारबीच प्रभावकारी समन्वय र सहकार्यका लागि स्रोत-साधन तथा जनशक्तिको व्यवस्थापन गरेर शिक्षालाई प्रभावकारी बनाइनुपर्नेमा जोड दिए।

मन्त्रालयका सहसचिव शिवकुमार सापकोटाले शिक्षा क्षेत्रको सुधारका लागि मन्त्रालय र सम्बद्ध निकाय तथा विकास साझेदार निकायबाट भइरहेको समन्वय र साझेदारीबारे उल्लेख गरेका थिए। विकास सहायता समन्वय शाखाका प्रमुख रमेशप्रसाद घिमिरेले कार्यक्रमको उद्देश्य माथि प्रकाश पारे।

बैठकको प्राविधिक सत्रमा शिक्षा मन्त्रालय र शिक्षा तथा मानव स्रोत विकास केन्द्रले आव ०८३/८४ का लागि अर्थ मन्त्रालयबाट प्राप्त भएको बजेट सिलिङका आधारमा शिक्षा मन्त्रालयबाट प्रस्ताव गरिएका विभिन्न कार्यक्रमको विषयमा समीक्षा भएको छ।

बैठकले शिक्षा क्षेत्रसँग सम्बन्धित विभिन्न सूचकका विषयमा शिक्षा मन्त्रालय र सम्बद्ध निकायबाट भएको प्रगतिको पनि समीक्षा गरेको छ।

विशेषगरी शिक्षा क्षेत्रमा आगामी आर्थिक वर्षमा तय गरिएका प्राथमिकताका क्षेत्रहरू, कस्ता-कस्ता कार्यक्रम राखिएका छन् के- कस्ता बजेट तर्जुमा भए तथा तीन तहको सरकारले खर्च गर्ने बजेट तथा कार्यक्रमबारे समीक्षा गरिएको छ। शिक्षाको अधिकांश बजेट स्थानीय तहबाट कार्यान्वयन हुने गरेको छ।

समूहगत छलफलमा एसईएसपीको कार्यान्वयनमा रहेका मुख्य चुनौती, संघ, प्रदेश र स्थानीय तहका शिक्षासँग सम्बद्ध पदाधिकारीको सहभागिता थियो। छलफलमा मुख्य गरी एसईएसपी कार्यान्वयनका सन्दर्भमा प्रदेश र स्थानीय तहले भोगिरहेका समस्या र ती समस्याहरूको समाधानका लागि आगामी दिनमा प्रदेश सरकार, स्थानीय सरकार र संघीय सरकारबाट अवलम्बन गर्ने कार्यनीति र रणनीतिहरूबारे छलफल भएको छ।

८ जेठमा समीक्षा बैठक सकेर अर्थ मन्त्रालयमा समापन गरिनेछ। छलफलमा आएका विषयलाई समेटेर आगामी ६ महिनामा गर्नुपर्ने समझदारीका कार्यहरू अघि बढाइनेछ।

एसईएसपी योजना नेपालको शिक्षा क्षेत्रको विकास र सुधारका लागि लागु गरिएको १० वर्षे (वि.सं २०७९-२०८८) दीर्घकालीन रणनीतिक योजनाको बालबालिकाका लागि समतामूलक, समावेशी र गुणस्तरीय शिक्षा सुनिश्चित गर्ने उद्देश्य छ।