काठमाडौँ । नेपाली कम्युनिस्ट पार्टी (नेकपा) सप्तरीले जिल्लाका एक गाउँपालिका उपाध्यक्षसहित १० जना निर्वाचित जनप्रतिनिधिलाई पदमुक्त गर्ने प्रक्रिया अघि बढाउन पार्टी केन्द्रसमक्ष सिफारिस गरेको छ।

राजविराजमा सम्पन्न पार्टीका केन्द्रीय कमिटी सदस्यहरूको बैठकले प्रतिनिधिसभा निर्वाचनका क्रममा पार्टीका आधिकारिक उम्मेदवारको विपक्षमा गतिविधि गरेको निष्कर्ष निकाल्दै सम्बन्धित जनप्रतिनिधिमाथि कारबाहीको प्रस्ताव गरेको जनाएको छ। पार्टीका अनुसार उक्त गतिविधिले निर्वाचन परिणाममा प्रतिकूल प्रभाव पारेको ठहर गरिएको छ।

कारबाहीका लागि सिफारिस गरिएकामध्ये छिन्नमस्ता गाउँपालिकाकी उपाध्यक्ष राजोदेवी यादव रहेकी छन्। त्यस्तै, छिन्नमस्ता गाउँपालिका–१ का वडाध्यक्ष ललन यादव, वडा नं. ६ का कपलेश्वर साह, राजविराज नगरपालिका-७ का सुभाष यादव, वडा नं. ८ का जयनारायण मण्डल तथा वडा नं. १० का गंगाराम खंग पनि सिफारिसको सूचीमा परेका छन्।

यसैगरी, विष्णुपुर गाउँपालिका-१ का वडाध्यक्ष बलराम यादव, रूपनी गाउँपालिका–२ का सरोज यादव, तिलाठी कोइलाडी गाउँपालिका–४ का मुनिलाल मुखिया तथा सुरुंगा नगरपालिका-१ का छत्रबहादुर राउतलाई समेत पदमुक्त गर्न प्रस्ताव गरिएको छ।

बैठकले सम्बन्धित जनप्रतिनिधिहरूले पार्टीको हितविपरीत कार्य गर्दै निर्वाचनमा पार्टी उम्मेदवारलाई पराजित गराउन भूमिका खेलेको आरोप पुष्टि भएको दाबी गरेको छ। त्यसै आधारमा कानुनी प्रावधानअनुसार आवश्यक प्रक्रिया अगाडि बढाउन पार्टी केन्द्रलाई आग्रह गरिएको जनाइएको छ।

पार्टीका केन्द्रीय सदस्य गोविन्द न्यौपाने का अनुसार पार्टीविरुद्धको गतिविधिमा संलग्न भएको निष्कर्षपछि निर्वाचन आयोगमार्फत कानुनी कारबाहीको प्रक्रिया अघि बढाउने विषयमा केन्द्रलाई सिफारिस गरिएको हो।

बैठकमा पार्टीका मधेश प्रदेश इन्चार्ज महेन्द्र राय यादव, सहइन्चार्ज विश्वनाथ साह तथा सहसंयोजक सुधिर साह को सहभागिता रहेको थियो।

उक्त बैठकले संगठनात्मक व्यवस्थापनसँग सम्बन्धित अर्को निर्णयसमेत गरेको छ। पार्टीका केन्द्रीय सदस्य सूर्यनाथ यादव का अनुसार जिल्लाका सबै १८ स्थानीय तहमा संगठन समायोजनको काम आगामी असार १० गतेभित्र सम्पन्न गर्ने निर्णय गरिएको छ।