चितवन। राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत निर्वाचन प्रक्रिया अघि बढेसँगै महाधिवेशनस्थल परिसरमा प्रचारले तीव्रता पाएको छ।

रास्वपाको सदस्य पदका लागि पहिलो चरणमा हुन गइरहेको निर्वाचनमा उम्मेदवारी दिने नेता एवं तिनका प्रस्तावक, समर्थक, शुभेच्छुक र कार्यकर्ता बिहानैदेखि आ-आफ्नो पक्षमा मत माग्न व्यस्त देखिन्छन्। अत्यधिक गर्मीका बाबजुत उम्मेदवारी घोषणा गर्ने मन्त्रीसहित सांसद तथा नेताहरू प्रचारमा व्यस्त हुँदा चुनावी माहोल तातेको छ।

पार्टीसम्बद्ध केन्द्रीय निर्वाचन आयोगले उम्मेदवारको सूची सार्वजनिक गरी नसकेकाले कतिजना मन्त्री उम्मेदवार छन् भन्ने स्पष्ट छैन। तर पनि केही मन्त्री भ्याइनभ्याइ मत मागिरेका छन्।

बिहानैदेखि महाधिवेशन परिसरमा उम्मेदवारी घोषणा गरेका मन्त्री र सांसदका शुभेच्छुक तथा कार्यकर्ता प्रचार सामग्री बाँडेर मत मागिरहेको देखिन्छ। उम्मेदवारको सङ्ख्या धेरै भएको र सबैलाई चिन्न नसक्ने भएकाले मत माग्नुपरेको उनीहरूको भनाइ छ।

महत्त्वपूर्ण पदमा रहेकालाई पराजित हुने डर भएकाले दुईदिन अघिदेखि नै मत माग्न थालेको बताउँदै पार्टीका केन्द्रीय सदस्य राजन गौतमले भने, “मन्त्री, सांसद र नेताहरूले निरन्तर फोन गर्दै भोट मागिरहनुभएको छ। निर्वाचनका क्रममा यसलाई स्वभाविक रूपमै लिनुपर्दछ।”

नेता गौतमले पर्चा, पम्प्लेट, गीत, झाँकी, समाचार र सामाजिक सञ्जालको प्रयोग गरी व्यापक रूपमा प्रचार भइरहेको अवस्थामा उद्योग संघको परिसरभित्र पर्चा पम्प्लेटलगायत सामग्री निषेध गरिएको बताए।

रास्वपाको विधानमा सभापति र केन्द्रीय सदस्यका लागि पहिलो चरणमा निर्वाचन हुने तथा निर्वाचित सदस्य मात्र दोस्रो चरणमा हुने निर्वाचनमा उम्मेदवार पाउने व्यवस्था रहेकाले सदस्यको निर्वाचनले प्राथमिकता पाएको रास्वपा चितवनका सचिव तेजेन्द्र पौडेल बताउँछन्।

उनले महाधिवेशनमा चार हजार बढी प्रतिनिधिले मताधिकार प्रयोग गर्ने चितवन महाधिवेशनमा ९९ सदस्य पदका लागि हुने निर्वाचनमा चार सयभन्दा बढीको उम्मेदवारी पर्ने देखिएको अवस्थामा अहिले व्यापक रूपमा प्रचार हुनुलाई स्वभाविक रूपमा लिनुपर्ने बताए।

राजनीतिक विश्लेषकका अनुसार रास्वपाको यसअघि प्रदेशहरूमा सम्पन्न निर्वाचनमा पार्टीका संस्थापक नेता एवं सांसदहरूसमेत अप्रत्यासित रूपमा पराजित भएकाले पनि पदमा रहेकाहरू चुनाव प्रचारमा खटिन बाध्य हुनुपरेको हो।

पार्टीको निर्वाचित ९९ सदस्यीय केन्द्रीय सदस्य पदका लागि विद्युतीय मतदान प्रक्रियामार्फत हुने निर्वाचनमा ४०० भन्दा बढीको उम्मेदवारी परेको छ। खुलातर्फको भन्दा पनि क्लस्टरबाट धेरै सदस्य निर्वाचित हुने प्रावधान भएकाले निर्वाचन थप पेचिलो बनेको देखिन्छ। -रासस