काठमाडौँ। साउदी अरबको सरकारले ३३ नेपाली कैदीबन्दीलाई आममाफी दिएको छ।

पवित्र रमजान १४४७ हिजरी (२०२६) का अवसरमा ३३ नेपाली कैदीबन्दीलाई शाही आममाफी प्रदान गरेकामा साउदी अरब अधिराज्यको सरकारप्रति नेपाल सरकारले आज (मंगलबार) कृतज्ञता तथा प्रशंसा व्यक्त गरेको छ।

नेपाल सरकारले यस उदार कदमलाई नेपाल र साउदी अरब अधिराज्यबीच विद्यमान दीर्घकालीन मित्रता, सद्भाव तथा सौहार्दपूर्ण द्विपक्षीय सम्बन्धको प्रतिबिम्बका रूपमा उच्च मूल्यांकन गरेको परराष्ट्र मन्त्रालयले जनाएको छ।

यो आममाफी रियादस्थित नेपाली दूतावासमार्फत नेपाल सरकारले गरेको अनुरोधपश्चात प्रदान गरिएको हो। उक्त कैदीबन्दी साउदी अरबको कानुनी प्रक्रिया पूरा भएपछि नेपाल फर्किने मन्त्रालयद्वारा जारी विज्ञप्तिमा उल्लेख छ।