वरिष्ठ अधिकृत बाबुलाल तिरुवालाई चिडियाखानाको निमित्त प्रमुखको जिम्मेवारी
काठमाडौँ। सदर चिडियाखाना जावलाखेलका प्रमुख सत्यनारायण साह छानबिनमा तानिएका छन्। उनलाई पदबाट समेत हटाइएको छ।
चिडियाखानामा बर्डफ्लु (एच फाइभ एन वान) को संक्रमण पुष्टि भएको विषय राष्ट्रिय प्रकृति संरक्षण कोष (एनटीएनसी) को केन्द्रीय कार्यालयलाई समयमै जानकारी नगराई गुपचुप राखेको आरोपमा साह छानबिनमा तानिएका हुन्।
कोषको अध्यक्षसमेत रहेकी कृषि वन तथा पर्यावरणमन्त्री गीता चौधरीको निर्देशनमा कोषले साहलाई चिडियाखाना प्रमुखको पदबाट हटाएको छ। कोषले चिडियाखानामा फैलिएको बर्डफ्लुको कारण पत्ता लगाउन प्रवक्ता एवं प्रजाति विभाग प्रमुख रचना शाहको संयोजकत्वमा तीन सदस्यीय छानबिन समिति बनाएको हो।
छानबिन समिति सदस्यमा कोषका प्रशासन प्रमुख हरिविक्रम सिंह र संरक्षण क्षेत्र विभागका प्रमुख मधु क्षेत्री छन्। समितिलाई एक साताभित्र छानबिन गरेर प्रतिवेदन पेस गर्न निर्देशन दिइएको छ।
वन्यजन्तुको सुरक्षा र सूचना प्रवाहमा संवेदनशील नभएको उल्लेख गर्दै कोषले प्रमुख साहलाई केन्द्रीय कार्यालयमा तानेको छ। साहलाई जिम्मेवारीबाट हटाइएकाले चिडियाखानाको निमित्त प्रमुखको जिम्मेवारी वरिष्ठ अधिकृत बाबुलाल तिरुवालाई दिइएको छ।
पशु सेवा विभागमा गरिएको नमुना परीक्षणबाट चिडियाखानाका जीवजन्तुमा बर्डफ्लु पुष्टि भएको थियो। चिडियाखानामा करिब १० दिन अघिबाटै पक्षी र जनावर मरे पनि यसबारे प्रकृति संरक्षण कोषको केन्द्रीय कार्यालयलाई साहले कुनै जानकारी दिएका थिएनन्।
चराचुरुंगी मर्ने क्रम नरोकिएपछि परीक्षण गर्दा बकुल्ला, लाटोकोसेरो, गिद्ध तथा जनावरतर्फ नीरबिरालो र चरीबाघमा समेत बर्डफ्लु फेला परेको थियो।
रोग संक्रमणका कारण वन्यजन्तु मरेको धेरै दिन बितिसक्दा कुनै जानकारी नदिइएपछि साहलाई जिम्मेवारीबाट हटाउन निर्देशन दिइएको हो।
पछिल्ला समयमा चिडियाखानामा भएका शृंखलाबद्ध घटना र बर्डफ्लुजस्तो संवेदनशील विषयमा बेलैमा केन्द्रलाई रिपोर्टिङ नगरेका कारण कोषले साहमाथि विभागीय कारबाही गर्दै अनुसन्धान अघि बढाएको हो।
