काठमाडौँ। मध्यपूर्व युद्ध समाप्त गर्न इरानसँग भइरहेको वार्ताको क्रममा अमेरिकी विदेशमन्त्री मार्को रुबियो आजदेखि तीनवटा खाडी देशको भ्रमण सुरु गर्दै छन्।

अमेरिका र इजरायलले फेब्रुअरी २८ मा युद्ध सुरु गरेपछि उनी पहिलो पटक यो क्षेत्रको भ्रमणमा जान लागेका हुन्।

विदेशमन्त्री रुबियोले संयुक्त अरब इमिरेट्स, कुवेत र बहराइनको भ्रमण गर्नेछन्। यो भ्रमण बिहीबारसम्म चल्ने अमेरिकी विदेशमन्त्रालयका प्रवक्ता टोमी पिगोटले विज्ञप्तिमा उल्लेख गरेका छन्।

‘इरानसँगको समझदारीपत्र, हर्मुज जलडमरुबाट पूर्ण र स्वतन्त्र रूपमा सुरक्षित यातायात सुनिश्चित गर्ने प्रयास, तथा क्षेत्रीय शान्ति र स्थिरताको महत्त्व’ विषयमा रुबियोले छलफल गर्ने विज्ञप्तिमा उल्लेख छ।

बिहीबार बहराइनमा रुबियोले खाडी सहयोग परिषद्सँग पनि बैठक गर्ने र क्षेत्रीय साझा प्राथमिकताहरूबारे छलफल गर्ने कार्यक्रम छ।

रुबियोको सामु खाडी राष्ट्रहरूसँगको विश्वास पुनर्स्थापित गर्ने चुनौतीपूर्ण काम छ, किनकि यी देशहरू अमेरिका–इजरायल हमलाको बदलामा इरानको लक्षित क्षेत्र बनेका थिए।

इरानले अमेरिकी सेनाको पाँचौँ फ्लिटको मुख्यालय रहेको कुवेत र बहराइनलाई अमेरिकालाई आक्रमण गर्न आफ्नो भूमि प्रयोग गर्न दिएको आरोप लगाएको छ।

अमेरिकी उपराष्ट्रपति जेडी भान्स आइतबार स्विट्जरल्यान्डमा इरानी अधिकारीहरूसँग समझदारी पत्रमा आधारित सम्झौता तय गर्न व्यस्त रहेका थिए। उक्त समझदारीले वार्ताकारहरूलाई ६० दिनभित्र सम्झौता गर्न समय दिएको छ।

इरानले प्रभावकारी रूपमा बन्द गरेको हर्मुज जलडमरु पुनः खोल्ने विषय उक्त समझदारीको मुख्य बुँदाहरूमध्ये एक हो। यस जलमार्गबाट विश्वको करिब २० प्रतिशत तेल ओसारपोसार हुन्छ।