मुस्ताङ। मुस्ताङको घरभपझोङ गाउँपालिका २‚ मार्फामा ३३ वर्षीय महिलाको शङ्कास्पद मृत्यु भएको छ।

उत्तरगङ्गा गाउँपालिका ५‚ रसुवा स्थायी घर भई मार्फास्थित विश्व लालचनको घरमा डेरा गरी बस्ने शान्ति गुरुङ सोमबार राति करिब १२ बजे आफ्नै डेरामा मृत फेला परेको जिल्ला प्रहरी कार्यालयले जनाएको छ।

गोर्खा बारपाक गाउँपालिका १ माइत भएकी गुरुङ मृत फेला परेको सूचनापछि जिल्ला प्रहरीबाट प्रहरी अधिकृतसहितको अनुसन्धान टोली घटनास्थल पुगेको थियो। प्रहरी टोलीले घटनास्थल तथा शव जाँच प्रकृति मुचुल्कासहित प्रारम्भिक अनुसन्धान सुरु गरेको जिल्ला प्रहरीका सूचना अधिकारी नवराज न्यौपानेले जानकारी दिए।

प्रहरीले शव परीक्षणका लागि प्रदेश अस्पताल जोमसोम पठाएको छ। गुरुङका २३ वर्षीय पति अश्विन थापामगरलाई पक्राउ गरी प्रारम्भिक अनुसन्धान सुरु गरेको प्रहरीले जनाएको छ। घटनाका सम्बन्धमा प्रहरीमा किटानी जाहेरी परेकाले अभियुक्तमाथि अनुसन्धान गर्न १० दिनको म्याद थप भइसकेको प्रहरीको भनाइ छ।