काठमाडौँ । यूएईमा विकसित घटनाबारे पुष्टि नहुने भिडिओ र तस्बिर सार्वजनिक नगर्न अबुधाबीस्थित नेपाली राजदूतावासले सचेत गराएको छ।

दूतावासले अपिल प्रकाशन गर्दै अहिले युएईमा विकसित भइरहेको परिस्थितिका सन्दर्भमा सामाजिक सञ्जाल प्लेटफर्म वा अन्य कुनै पनि प्राविधिक माध्यममार्फत अज्ञात स्रोतबाट आएका हल्ला तथा आधिकारिक रूपमा पुष्टि नभएका सामग्री प्रकाशन वा प्रसारण नगर्न र सुरक्षा स्थितिबारे भ्रम फैलिने सन्देश प्रवाह नगर्न आग्रह गरेको हो।

अपीलमा भनिएको छ, ‘युएईमा रहेका सम्पूर्ण नेपाली समुदायलाई यस्तो कार्य नगर्न अनुरोध गरिएको छ। यस्ता कार्य कानुनबमोजिम दण्डनीय हुने चेतावनी यूएईका आधिकारिक निकायबाट जारी भएको छ।’

यस्तै, अपिलमा विकसित परिस्थितिबारे सही जानकारीका लागि यूएईका आधिकारिक निकायले जारी गर्ने अपडेट र सूचना हेर्नसमेत अनुरोध गरिएको छ । आधिकारिक अपडेटका लागि सम्पर्क सूत्र पनि दिइएको छ।