काठमाडौँ। नेपाली कांग्रेसका उपसभापति विश्वप्रकाश शर्माले नागरिकले चाहेको जस्तो बदलिएको कांग्रेसप्रति जनविश्वास बढ्दै गएको बताएका छन्।

जनता समाजवादी पार्टीका केन्द्रीय सदस्य तथा समानुपातिक उम्मेदवारहरूलाई कांग्रेसमा स्वागत गर्दै उपसभापति शर्माले देशभरको माहोल कांग्रेसको पक्षमा बढ्दै गएको बताए। उनले आगामी प्रतिनिधिसभा निर्वाचनको मिति नजिकिदै जाँदा कांग्रेसप्रतिको लहर उत्साहपूर्ण रहेको दाबी गरे।

अहिलेकै अवस्थामा कांग्रेस सबैभन्दा ठूलो पार्टी बन्ने शर्माको दाबी गरे। यही गतिमा जनमत बढ्दै जाँदा आगामी एक साताभित्र कांग्रेसले बहुमत ल्याउने तहमा पुग्ने उनको ठोकुवा छ। शर्माले भने‚ “नागरिकले नयाँ खोज्नुभएको हो भने जेन-जी मुभमेन्टपछि नयाँ भएको कांग्रेस‚ परिवर्तन खोजेको हो भने परिवर्तन नै भएको आएको कांग्रेस हो।”

दैनिकजसो कांग्रेसमा समाहित हुनेको संख्या बढेको दाबी गर्दै शर्माले कांग्रेस पहिलेभन्दा बलियो बनेको बताए। कांग्रेस आफैँ बदलिएर समाज र देश बदल्न अग्रसर भएको उनले बताए। “कसैले आफैँलाई बदल्न सक्दैन तर, देश बदल्छु भन्छ भने त्यसलाई पनि सुनौँला‚” उनले भने‚ “तर जो आफूलाई बदल्न सक्छ त्यसले नै देश बदल्छ भन्ने मान्यताबमोजिम नेपाली कांग्रेस अहिले जनताको विश्वास जित्नेगरी अघि बढेको छ। दैनिक हजारौँ मानिस कांग्रेसमा समाहित हुनुभएको छ।”

चितवनबाट थालेको यात्रा पश्चिमका जिल्ला पुगेर काठमाडौँ फर्केका शर्माले हल्लाका भरमा नभई जरा बलियो बनाउन सबै नेताकार्यकर्ताहरू एकढिक्का भएर लागेको बताए। पार्टी नेता कार्यकर्तासँगै आमजनताको विश्वास कांग्रेसप्रति बढ्दै गएको शर्माको भनाइ छ। विशेष महाधिवेशनपछि बदलिएको कांग्रेसले आफूलाई अब्बल साबित गर्दै आएको छ। कांग्रेसले बुधबार ६ गते जनकपुरबाट पार्टीको प्रतिज्ञापत्र सार्वजनिक गर्दै छ।

यो पनि…

जसपा केन्द्रीय सदस्यसहित समानुपातिक उम्मेदवार कांग्रेसमा प्रवेश