काठमाडौँ। गृहमन्त्री ओमप्रकाश अर्यालसहित विभिन्न मन्त्रीले सिंहदरबार परिसरमा निर्माणाधीन संघीय संसद् भवनको स्थलगत निरीक्षण गरेका छन्।

गृहमन्त्री अर्यालसहित परराष्ट्रमन्त्री बालानन्द शर्मा, स्वास्थ्य तथा जनसंख्यामन्त्री सुधा गौतम र महिला बालबालिका तथा ज्येष्ठ नागरिकमन्त्री श्रद्धा श्रेष्ठले संसद् भवनका विभिन्न संरचना अवलोकन गरी जानकारी लिए।

उनीहरूले संसद् बैठक बस्न तयार गरिएको नयाँ ‘मल्टिपर्पोज हल’, निर्माणाधीन प्रतिनिधसभा र राष्ट्रियसभा हलको अवलोकन गरेका थिए। अनुगमनका क्रममा गृहमन्त्री अर्यालले प्रतिनिधिसभाका नवनिर्वाचित सांसदहरूको शपथका लागि बैठक कक्षको सबै तयारी अवस्थामा रहेको जानकारी दिँदै आवश्यक परेको खण्डमा प्रतिनिधिसभाको बैठक पनि बस्न सकिने गरी व्यवस्थापन गरिएको निर्माणपक्षले जानकारी गराएको बताए।

उनले भने, “नयाँ भवनमा शपथ ग्रहणका लागि मात्र नभई पूर्ण अधिवेशन नै सञ्चालन गर्नुपरे पनि त्यसका लागि सबै तयारी अवस्थामा छ। प्रतिनिधिसभा र राष्ट्रिय सभाको संयुक्त बैठकका लागि समेत आवश्यक पूर्वाधार तयार पारिएको छ। सभामुखको कार्यकक्ष र कार्यव्यवस्था परामर्श समितिको लागि पनि ठाउँ बनिसकेको छ।”

भवनभित्रको सिट योजना (सिट प्लानिङ) र फर्निचर व्यवस्थापन सन्तोषजनक रहेको उल्लेख गर्दै उनले माइक तथा स्क्रिन जडानको कामसमेत द्रुत गतिमा भइरहेको जानकारी दिए। अस्थायी व्यवस्थापन भए पनि फर्निचर र प्रविधिको प्रयोग गुणस्तरीय रहेको र कामले गति लिएको उनको भनाइ थियो।

नयाँ संसद् भवनको निर्माण कार्य अन्तिम चरणमा पुगेको सहरी विकास तथा भवन निर्माण विभागले जनाएको छ। करिब १५६ रोपनीभन्दा बढी क्षेत्रफलमा निर्माण भइरहेको नयाँ संसद् भवन तयार भएपछि संघीय संसद्‌का सम्पूर्ण गतिविधि यही नयाँ संरचनाबाट सञ्चालन हुनेछन्। भवन निर्माण गरिरहेको टुन्डी-सेक जेभी परियोजनाका प्रमुख प्रमेन्द्रकृष्ण श्रेष्ठका अनुसार संघीय संसद् भवन, प्रतिनिधिसभा भवन, राष्ट्रियसभा भवन, अतिविशिष्ट कक्ष, संसदीय दलको कार्यालय भवन, संसदीय समितिको भवन र अन्य कार्यालयलगायत १२ भवन हुनेछन्।

संसद् भवन परिसरमा बिरुवारोपण
सिंहदरबार परिसरमा निर्माणधीन संघीय संसद् भवन परिसरमा मन्त्रीहरूले बिरुवारोपण गरेका छन्। गृहमन्त्री ओमप्रकाश अर्याल, उद्योग, वाणिज्य तथा आपूर्तिमन्त्री अनिलकुमार सिन्हा, वन तथा वातावरणमन्त्री माधवप्रसाद चौलागाई, परराष्ट्रमन्त्री बालानन्द शर्मा, स्वास्थ्य तथा जनसंख्यामन्त्री सुधा गौतम र महिला बालबालिका तथा ज्येष्ठ नागरिकमन्त्री श्रद्धा श्रेष्ठले बिरुवारोपण गरेका हुन्। रुद्राक्ष, कपुर, धुपी र समीका बिरुवा रोपिएका हुन्।