काठमाडौँ। विशेष अदालतले राहदानी छपाइ प्रकरणमा पक्राउ परेका राहदानी विभागका महानिर्देशक तीर्थराज अर्याललगायत पाँच जनालाई धरौटीमा रिहा गर्न आदेश गरेको छ।

विशेष अदालतका न्यायाधीश नारायणप्रसाद पौडेल, हेमन्त रावल र उमेश कोइरालाको संयुक्त इजलासमा भएको थुनछेक बहसपछि उनीहरूलाई धरौटीमा रिहा गर्न आदेश दिएको हो। अदालतले राहदानी विभागका महानिर्देशक अर्याललाई पाँच लाख र निर्देशक सुनीलकुमार केसीलाई चार लाख रुपैयाँ धरौटीमा रिहा गर्न आदेश गरेको छ।

यस्तै कर्मचारीहरू शाखा अधिकृत सोमेश थापासँग तीन लाख, कम्युटर इन्जिनियर विपिन प्रसाईंसँग तीन लाख र ठेकेदारको नेपाल एजेन्ट मणिन्द्रराज मल्लसँग पाँच लाख रुपैयाँ धरौटी माग गरेको विशेष अदालतका उपरजिस्ट्रार एवं प्रवक्ता कृष्णशरण लामिछानेले जानकारी दिए।

त्यस्तै अदालतले लेखा अधिकृत तुलसीप्रसाद आचार्य र उपसचिव राजाराम दाहाललाई साधारण तारेखमा रिहा गर्न आदेश दिएको छ। अख्तियार दुरुपयोग अनुसन्धान आयोगले राहदानी छपाइ प्रकरणमा भ्रष्टाचार भएको भन्दै राहदानी विभाग महानिर्देशक अर्यालसहित १६ जना व्यक्ति र दुई कम्पनीलाई प्रतिवादी बनाएर १० अर्ब १३ करोड चार लाख ६१ हजार ४७७ रुपैयाँ बिगो दाबीसहित मुद्दा दायर गरेको थियो।