गुल्मी। नेपाली कांग्रेसका उपसभापति विश्वप्रकाश शर्माले देशको विषम परिस्थितिलाई निकास दिन सक्ने ताकत आफ्नो पार्टीसँग मात्रै भएको बताएका छन्।
गुल्मी १ मा शनिबार आयोजित चुनावी सभामा उनले अहिले देशलाई निकास दिने कांग्रेसबाहेक अन्य पार्टी नभएको दाबी गरे। उनले भने‚ “सबै क्षेत्रका योग्य र विज्ञलाई जोडेर देश सम्हाल्ने तागत आजका दिनमा कांग्रेसका सभापति गगनकुमार थापामा रहेको छ। चन्द्र भण्डारीजस्तो विज्ञको नेतृत्वमा संरचना बनाएर सिंगो समाजमा राम्रोसँग ड्राइभ गर्नसक्छ भन्नेमा हामी विश्वस्त छौँ। देश सम्हाल्ने विश्वास दिलाएका छन्। परिस्थितिलाई सम्हाल्ने तागत अहिले कांग्रेसका सभापति गगनकुमार थापासँग मात्रै छ।”
उपसभापति शर्माले थापा प्रधानमन्त्रीको कुर्सीमा बस्दै गर्दा आफूसहितका नेताहरूले सांसदले सही मुद्दा उठाए वा उठाएनन् भनेर हेर्ने र आफ्नो क्षेत्रमा प्रत्येक दुई महिनामा आएर मतदाताको समस्या बुझे कि बुझेनन् भनेर झक्झकाउने बताए।
उनले भने‚ “संसदमा नरहेका मसहित साथीहरूले जितेको सांसदले सही मुद्दाको उठाए वा नउठाएको हेर्ने र आफ्नो क्षेत्रका प्रत्येक दुई महिनामा एकपटक आएर मतदाताको समस्या बुझे वा नबुझेको पार्टी कार्यालयमा बसेर झक्झकाउने काम गछौँ।”
उपसभापति शर्माले यो क्षेत्र कांग्रेस निर्वाचित भएपछि गुल्मीको अधिकतम विकासमा ध्यान दिनेमा चन्द्र भण्डारी जिम्मेवार परिपक्व नेता भएकाले ढुक्क भएर जिताउन आग्रह गरे।
उनले गुल्मीका मतदातासामु भण्डारीले गरेका प्रतिबद्धता उनको मात्रै नभएर अब देशको नेतृत्व गर्ने कांग्रेसका सभापति थापाको पनि भएको बताए।
