काठमाडौँ। काठमाडौँ उपत्यका अपराध अनुसन्धान कार्यालयको टोलीले विदेश पठाउने भन्दै २३ लाख ६५ हजार रुपैयाँ ठगी गरेको आरोपमा तीन जनालाई पक्राउ गरी सार्वजनिक गरेको छ।

पक्राउ पर्नेमा चितवन रत्ननगर नगरपालिका १ का ५० वर्षीय युवकराज पराजुली, दोलखाको जिरी नगरपालिका ३ का ३४ वर्षीय टंकबहादुर खड्का तथा सुनसरीको धरान उपमहानगरपालिका ६ का ३४ वर्षीय मनीष पोदार रहेका उपत्यका अपराध अनुसन्धान कार्यालयका प्रहरी उपरीक्षक सुरतकुमार थापा क्षेत्रीले जानकारी दिए।

“पक्राउ परेकामध्ये पराजुलीले न्युजिल्यान्ड पठाउने भन्दै १६ लाख ६५ हजार रुपैयाँ, खड्काले लिथुआनिया पठाउने भन्दै पाँच लाख रुपैयाँ तथा पोदारले बेलायत पठाउने भन्दै दुई लाख रुपैयाँ लिई विदेश नपठाई सम्पर्कविहीन भएको उजुरीका आधारमा पक्राउ गरिएको हो‚” उनले भने।

उनका अनुसार पक्राउ परेका तिनै जनालाई थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको छ।